Boneiru ta un Entidat Públiko i konforme derecho di estado e ta parti di Hulanda. Esaki ta nifiká ku Boneiru ta kai bou di gobièrnu i parlamentu (2e Kamer) i senado (1e Kamer) hulandes tambe. Boneiru konosé dos gobièrnu ku ambos ta representá na nos isla. Banda di gobièrnu di Reino (dirigí for di Den Haag – Hulanda), Boneiru tin un propio gobièrnu lokal tambe, yamá Entidat Públiko Boneiru.

Gobièrnu lokal (OLB)

Entidat Públiko Boneiru ta konsistí di tres parti, Konseho Insular (kaminda e representantenan di pueblo ta sinta), Kolegio Ehekutivo (ku ta konsistí di e diputadonan di nos isla ku huntu ku gezaghèber ta forma e poder gubernamental) i e aparato públiko ku ta repartí den diferente direktorado (aki bo ta haña e forsa ehekutivo).

Gobièrnu di Reino 

Na nos isla Gobièrnu di Reino tin su tarea i kompetensianan ku ta sali for di e diferente ministerionan. Tin algun ministerio ku en realidat ta establesé riba nos isla ku 1 òf mas persona (manera Ministerio di Salubridat Públiko, Bienestar i Deporte den forma di e Ofisina di Seguro di Kuido – ZVK; Ministerio di Finansa den forma di Servisio di Impuesto Hulanda Karibense; Ministerio di Asuntunan Sosial i di Labor).

No tur ora por yama e koperashon entre e dos gobièrnunan aki perfekto, hopi biaha tambe pasobra sierto tareanan ta partí riba diferente ministerio, òf ta un kombinashon entre gobièrnu lokal i gobièrnu di Reino. Empresarionan lo ripará esaki pa motibu di e diferente lokètnan ku nan mester pasa obligatoriamente pa regla nan asuntunan. Esaki hopi biaha ta inesesariamente kompliká, sigur konsiderando e eskala chikitu di nos isla.

Di otro banda e situashon aki ta krea oportunidat tambe, mirando ku lei i regulashon ta bini for di un sistema hulandes stabil, kaminda transparensia i bon gobernashon ta na promé lugá.

Hasi negoshi na Boneiru

O tuma kontakto ku nos