Kareteranan

Kareteranan di Boneiru ta konsistí di un kombinashon di kaminda di asfalt òf betòn i kaminda di tera. Prinsipalmente e parti meimei di Boneiru (Kralendijk) i den direkshon nort (Rincon) tin kaminda di asfalt / betòn. Banda di esei ta posibel pa kore di nort pa sùit riba kamindanan di asfalt / betòn. Drecha e kamindanan òf traha kaminda nobo ta altamente nesesario. Karakterístika di e kareteranan ta asfalt tur kibrá ku tur aña ta bira mas i mas malu. Pa motibu di e poblashon ku ta krese (inkluso e oumento drástiko di e kantidat di vehíkulo), hopi awaseru i trùk- i bùsnan grandi e kamindanan mester soportá hopi. Te ku awor gobièrnu no a presentá un plan di akshon pa atendé na un manera struktural ku e kareteranan.

Èrpòrt

Èrpòrt di Boneiru ta un aeropuerto internashonal, yamá Flamingo International Airport. Banda di aerolineanan ku ta bula den region (ehèmpelnan ta Divi Divi Air i Insel Air, ambos ku base na Kòrsou), tin algun aerolinea mas grandi tambe ku ta bula for di Hulanda i Merka. For di Hulanda ta bin KLM (buelo diario) i TUI (4 biaha pa siman) ku un buelo kombiná (Aruba òf Kòrsou) pa Boneiru. For di Merka por lo menos 1 biaha pa siman ta bin Delta Airlines (for di Atlanta) i United Airlines (for di Houston i Newark). E èrpòrt tin un pista di aterisahe di 3 km ku ta sufisiente largu pa por risibí tur tipo di avion. Banda di esunnan menshoná den wenter di 2017 un aerolinea Canades, yamá Sunwing, tambe lo kuminsá ku un buelo semanal pa Boneiru. Nan lo bula tur djasabra for di Toronto ku un buelo direkto ora di bin i ora di bai bèk. Banda di esei tin kombersashonnan kontínuo tokante buelonan nobo ku aerolineanan nobo i eksistente.

Segun sifranan di Ofisina Sentral di Estadístika mas o menos 136.000 pasahero a biaha via nos aeropuerto den 2016.

Haf

Haf di Boneiru tin dos waf i ta sufisiente hundu pa e barkunan di mas grandi. Ta usa e wafnan pa tantu karga komo pasahero. Durante ‘high season’ (novèmber te ku mart) hopi barku krusero ta mara na e wafnan aki. Na aña 2016 en total 217.000 pasahero a yega Boneiru. E espektativa ta ku e kantidat aki lo krese den futuro. Karga ta yega via un sistema ‘roll-on roll-off’: na Kòrsou nan ta pone kònteiner riba un barku di transportá kònteiner i na Boneiru un trèker ta busk’é te riba e barku. Esaki ta nesesario pasobra Boneiru no ta disponé di un grua haltu ku por baha e kònteinernan direktamente for di barku. P’esei tur karga mester bini via Kòrsou. Esaki ta un faktor ku ta hisa gastu ku empresarionan mester tene kuenta kuné. Tin kombersashonnan ta tumando lugá tokante kompra di un grua di manera ku ta bira posibel pa laga barkunan mas grandi bini Boneiru. Sinembargo esaki por lo pronto ta algu di futuro.

Hasi negoshi na Boneiru

O tuma kontakto ku nos