Tin masha tiki negoshi ku no ta haña nan mes enbolbí ku e problema di finansiamentu di e empresa. Hopi biaha esaki ta e kaso den e parti inisial na momentu ku kuminsá ku e negoshi. Pero tambe ora tin plan di ekspanshon hopi biaha bo ta haña bo ku e pregunta: ‘Kon mi ta bai paga tur e kosnan aki?’

Diferente tipo di finansiamentu 

Tin hopi posibilidat pa haña finansiamentu: via banko, via famia / amigunan, via finansiamentu mikro (por ehèmpel Qredits), via ‘credit union’, via plataforma di ‘crowdfunding’ ets. Tur ta posibilidatnan ku por ta aplikabel riba bo kaso, un ta mas adekuá ku e otro. Pero pa tur opshon lo siguiente ta bálido: bo mester tin un plan bon argumentá (un plan di negoshi òf ‘business-plan’). Pa kada plan tin modelo / ‘template’ disponibel ku bo por ‘download’ fásilmente for di internèt. AKI bo ta haña un ehèmpel di un modelo di plan di negoshi pa bo empresa (ku bo ta bai kuminsá) (Nederlands).

Pa kada forma di finansiamentu bo ta haña un deskripshon kòrtiku aki bou:

Via banko

Tradishonalmente bankonan ta e lugá pa optené krédito komersial. Den kasi tur kaso e banko ke risibí un plan di negoshi bon pensá, den kua tin eksaktamente indiká kiko e plan ta, di unda e entradanan lo bini, kiko e gastunan lo bira ets. Leinan (severo) i supervishon riba bankonan ta e motibu ku ta pidi e empresario pa yena algun dokumentu. Bankonan ta kalkulá un interes riba e fiansa. E interes aki por varia di banko pa banko, pues e por ta bentahoso pa buska informashon na diferente banko. E suma ku bo por fia en prinsipio ta ilimitá, pero e lo dependé fuertemente di e plan i e garantia ku e banko ta haña. Hopi biaha nan ta pidi un garantia pa fiansa (por ehèmpel hipotek, kontribushon propio ets.).

Via Qredits

Qredits ta un fundashon ku ta duna finansiamentu mikro te un máksimo di 50.000 USD pa kada petishon. Den hopi kaso Qredits ta funshoná meskos ku un banko: aki tambe nan ta pidi sierto siguridat  pa pago bèk di e fiansa (manera un plan di negoshi bon hinká den otro, eventualmente un kontribushon propio ets.). Serka Qredits tambe bo mester yena diferente formulario i i kumpli ku diferente formalidat. Ora bo haña un fiansa serka Qredits, nan ta apuntá tambe un ‘coach’ ku huntu ku bo ta bai wak bo negoshi i ta sigui guia bo komo empresario.

Qredits ta den e mesun edifisio ku KvK na Kaya Amsterdam 23. Pa mas informashon wak e wèpsait di Qredits Bonaire.

Via Crowdfunding

Un manera pa yega na finansiamentu ta via crowdfunding. Nòrmalmente via un plataforma (manera www.kickstarter.com) bo ta haña e posibilidat pa ‘pitch’ un idea pa públiko grandi. E ora ei e públiko aki por invertí un suma chikitu den e idea di e empresario. Si e mesun empresario aki logra akumulá e suma ku a keda palabrá adelantá na invershon, e tin derecho riba e suma ku el a kolektá. Si e no kumpli ku e límite di e suma palabrá e empresario no ta haña nada i e sèn ta bai bèk pa e invershonistanan. Mas informashon tokante diferente plataforma ku ta ofresé crowdfunding bo ta haña AKI.

Preguntanan ku nan ta hasi hopi tokante finansiamentu

  • Kuantu ta kosta pa hasi negoshi?

    Un pregunta hopi usual ku nos ta haña tende hopi na KvK. Pero tambe un pregunta kasi imposibel pa kontestá sin sa spesífikamente ki tipo di negoshi bo tin na bista. Pasobra ta diferensiá di empresa pa empresa kuantu sèn bo mester pa kuminsá. Si bo ta un kònsùltent den merkadeo i komunikashon, e ora ei bo ta yega hopi leu ku un lèptòp i un wèpsait. Sinembargo si bo ta bai kuminsá un supermarket, e ora ei bo mester tin inventario, stòk ets. E último empresa aki pues lo eksigí hopi mas finansiamentu ku e promé ehèmpel. Laga nan informá bo bon kiko bo mester pa kuminsá, pa bo no haña bo ku sorpresanan ku bo no a spera.

  • Kua ta e bankonan ku tin na Boneiru?

    Tin varios banko ku ta aktivo na Boneiru ku por yuda bo komo kliente komersial. Kasi tur banko riba nos isla ta sukursal di un banko na Kòrsou (Girobank, RBC, Orco-bank i Banco di Caribe). Solamente MCB-bank tin un propio banko na Boneiru. Nan ta parti si di un totalidat mas grandi di banko na diferente isla. Ta difísil pa indiká kua banko ta pas mihó serka bo; nos ta konsehá bo pa drenta kombersashon ku diferente banko pa wak kiko nan por hasi pa bo. Asina bo por hasi un mihó eskoho kua banko bo ta preferá.

  • Qredits na Boneiru tin konekshon ku Qredits na Hulanda?

    Qredits na Hulanda for di 2008 ta aktivo kaba i ku hopi éksito. Entretantu na Hulanda nan tin un parti basta grandi den dunamentu di krédito mikro. Na aña 2015 e pedida a bini for di Boneiru pa ofresé e servisio aki na nos isla tambe. Esaki en realidat a tuma lugá tambe i for di e aña ei Qredits ta duna krédito na Boneiru. E ‘intake’ i guia ta tuma lugá na Boneiru mes, pero e evaluashon di e petishon i otorgamentu di e fiansa ta tuma lugá for di e ofisina prinsipal na Hulanda. Asina bo ta haña e forsa kombiná di dos organisashon aki na Boneiru. Pa mas informashon tokante e servisio ku Qredits ta duna, pasa un ratu serka nos na KvK.

O tuma kontakto ku nos