Desde 10 di òktober 2017 a habri e Lokèt pa Empresa (Bedrijvenloket) na KvK. Na e lokèt aki bo por pasa komo empresario ku tur bo preguntanan tokante pèrmit komersial. Nos tin tur formulario pa petishon ku bo mester, den diferente idioma. Gustosamente nos ta yuda bo ku yenamentu di e formularionan i ku konseho tokante kua pèrmit bo mester!

Pa ta aktivo komo empresario na Boneiru bo mester ta den poseshon di un òf mas pèrmit. Sea gobièrnu lokal (Entidat Públiko Boneiru) òf gobièrnu di Reino ta otorgá e pèrmitnan aki.

Pa kada empresa ta obligatorio pa disponé di un pèrmit di establesimentu, promé ku e por habri su portanan pa públiko. Banda di esei tin algun pèrmit adishonal mas ku ta nesesario, esaki ta dependé di e aktividatnan ku ta inskribí den e registro komersial. E pèrmitnan mas komun ta: pèrmit ambiental, pèrmit pa bende bibida stèrki i di hóreka, pèrmit di restorant i pèrmit pa bende riba kaya.

Pèrmit di establesimentu

Basá riba e Lei Establesimentu di Empresa BES (klek AKI pa e lei aktual). Tur empresa ku ta hasi negoshi na Boneiru mester ta den poseshon di un pèrmit di establesimentu. En total tin 3 eksigensia ku bo mester kumpli kuné pa bini na remarke pa un pèrmit:

  1. Bo mester tin sufisiente konosementu di e aktividatnan ku bo ta bai ehersé;
  2. Bo mester tin sufisiente kapital pa e aktividatnan ku bo ta bai ehersé;
  3. Bo no mester aktua kontra di interes general.

Esakinan ta eksigensianan bastante suphetivo ku lei ta pone i ku den práktika masha tiki biaha ta kondusí na problema. E aktividatnan ku nan ta papia di dje ta e aktividatnan ku bo ta inskribí den registro komersial.

Otro pèrmitnan

Banda di e pèrmit di establesimentu por ta ku bo mester di mas pèrmit pa habri bo negoshi. Esaki ta dependé di e aktividatnan ku bo a nota den e registro komersial. Pasa un ratu na e Lokèt di Empresa na KvK pa tende eksaktamente kua pèrmit bo tin ku pidi. Ku plaser nos ta yuda bo!

Preguntanan ku nan ta hasi hopi tokante Pèrmit

  • Kon mi por sa kua pèrmit mi mester pidi komo empresario?

    Bo a inskribí bo empresa den registro komersial. Un di e preguntanan ku nan ta hasi na bo ta: ‘Kua ta e aktividatnan ku en realidat bo ta bai ehersé’. E pregunta aki ta importante pasobra e ta indikativo pa e pèrmitnan ku bo mester pidi (òf nò). Na registro komersial nos ta mira hopi biaha ku empresarionan ke hasi ‘tur sorto di kos’, ku nan ke inskribí 50 aktividat (variando di karpinté te hardinero, di hürdó di outo te doño di restorant / bar). Tur esaki ta pèrmití pero e tin su otro banda di medaya tambe, pasobra pa masha hopi di e aktividatnan aki bo mester pidi pèrmit si bo inskribí nan den registro komersial. I por bai kosta bo bastante sèn, energia i tempu pa regla tur esei.

  • Mi ta bai añadí un aktividat; e ora ei tambe mi mester pidi pèrmit?

    Esei ta dependé di kua aktividat ta trata. Si bo ta bai duna konseho riba tereno di merkadeo ‘online’, mui probablemente un pèrmit èkstra no ta nesesario. Pero si bo ta bai habri un bar òf un restorant, bo mester di un pèrmit pa bende bibida stèrki / hóreka (drank- en horecavergunning). Pues laga nan informá bo bon na e Lokèt di Empresa di KvK promé ku bo bai añadí un aktividat.

  • Mi tin gana di haña konseho di e Lokèt di Empresa tokante un pèrmit; kon mi por alkansá nan?

    E Lokèt di Empresa ta parti di e Kas Empresarial (Ondernemershuis) di KvK. Bo por haña nan na Kaya Amsterdam 23. Banda di esei semper bo por manda nos un imeil i hasi bo pregunta na: bedrijvenloket@kvkbonaire.com òf yama +599 7175595. Pasa serka nos i gustosamente nos ta yuda bo ku bo preguntanan, duna bo informashon dirigí i eventualmente yuda bo ku yenamentu di e formularionan.

O tuma kontakto ku nos