Naturalmente semper por pasa ku bo no ke sigui ku bo empresa. Bo ke stòp definitivamente òf kisas sera bo empresa temporalmente. Si esaki ta e kaso, dentro di 7 dia bo mester pone registro komersial na altura di esaki. A base di lei nan a formulá diferente prosedura ku spesífikamente ta indiká kiko abo komo empresario / dirigente tin ku hasi i kiko bo tin ku entregá pa inskribí e kanselashon.

Likidá òf hasi inaktivo

Lei ta distinguí dos tipo di anulashon: un definitivo (ku nan ta yama tambe disolushon òf likidashon) òf un temporal (ku nan ta yama tambe kanselashon; den práktika hopi biaha nos ta papia di un empresa inaktivo). E dos tipo di anulashon aki no ta aplikabel serka tur forma hurídiko. Por ehèmpel, un negoshi propio (EZ) solamente bo por kanselá, un fundashon solamente bo por disolvé / likidá i un BV bo por tantu kanselá komo disolvé. Pues ta bon pa semper bo laga informá bo mes bon tokante kua prosedura ta esun adekuá. Pa esaki semper bo por haña informashon èkstra serka KvK. Un di nos trahadónan gustosamente ta sinta ku bo na mesa pa pasa den e formularionan i kontestá bo preguntanan. Mas informashon tokante e prosedura spesífiko bo ta haña AKI (Nederlands).

Preguntanan ku nan ta hasi hopi tokante anulashon di bo empresa

  • Kiko ta pasa si mi no anulá mi inskripshon den registro komersial?

    E registro komersial ta e registro kaminda tur empresa (pero tambe fundashon, asosiashon ets) ta menshoná. E registro ta e archivo básiko, e fuente di tur informashon. Si bo empresa ta inkluí den e registro komersial e ta un empresa legal; si bo no ta inskribí i bo ta bai kuminsá tòg, e ora ei bo ta ilegal. Esei no ta un situashon deseabel naturalmente.

    Si bo stòp di hasi negoshi, bo ke pa tur obligashon (hurídiko) para i pa otro instansianan sa ku bo a stòp ku bo empresa (por ehèmpel Servisio di Impuesto). Si bo no notifiká ku bo a stòp tur obligashon (hurídiko) ta keda; bo ta keda ku e obligashon pa paga e kontribushon anual; bo ta keda inskribí komo aktivo den registro komersial i pues tur otro instansia ta kere ku bo ta aktivo ainda. Bo ta keda responsabel pa e empresa ets.

  • Mi por anulá inskripshon di mi empresa pa medio di imeil / for di eksterior?

    Boneiru no konosé firma elektróniko; p’esei no ta posibel pa outentisá un dokumentu digitalmente. Un vershon ku a skèn ta fásil pa falsifiká, pa e motibu aki KvK Boneiru tin e maneho ku mester entregá kambio den registro komersial komo original (anulashon di inskripshon tambe ta kai bou di kambio). Esaki ta pa prevení ku personanan no-outorisá na un manera ilegal ta hasi kambio na bo empresa. Eventualmente bo por laga un organisashon outorisá na Boneiru firma bo formularionan digital si. Ku esaki nan ta garantisá e veresidat di e formularionan. Komo organisashon outorisá KvK ta konsiderá ofisinanan di abogado i notario lokal.

O tuma kontakto ku nos