Si bo ke traha komo empresario na Boneiru ta un obligashon pa bo registrá bo empresa den registro komersial. Si bo no hasi esaki bo empresa ta ilegal, i naturalmente bo ke prevení esaki. Bo ke sa mas tokante e registro komersial? E ora ei wak AKI (Nederlands).

No ta difísil pa inskribí bo empresa den registro komersial, pero e ta pidi si un tiki di bo atenshon i di bo tempu. Bo mester kumpli ku algun eksigensia legal pa logra un inskripshon eksitoso. Pa e inskripshon nan a desaroyá formulario di Kámara spesial kaminda bo por yena i entregá kambio / inskripshon. E formularionan di Kàmara aki bo por haña grátis na KvK òf bo por ‘download’ nan AKI (Nederlands).

Si bo a lanta un PERSONA HURÍDIKO na notario, den promé instante bo no tin mester di hasi hopi kos. Esaki pasobra e notario ta legalmente responsabel pa e inskripshon di bo persona hurídiko den registro komersial. Pero naturalmente abo komo empresario mester perkurá si pa yena e kontestanan korekto riba e formularionan. Pues sòru semper pa bo yena e formularionan huntu ku e notario. Si no ta un persona hurídiko bo ta lanta (por ehèmpel un negoshi propio (EZ) òf un Sosiedat Kolektivo (VOF) ), e ora ei bo mes tin ku inskribí e empresa aki.

Preguntanan ku nan ta hasi hopi tokante inskripshon

  • Mi mester inskribí mi empresa?

    Si, tur hende ku ta aktivo na Boneiru mester inskribí su empresa den registro komersial. Lei ta distinguí 3 tipo di inskripshon: persona hurídiko, empresa i sukursal.

  • Ki ora mi mester inskribí?

    Lei ta eksigí ku bo tin ku registrá bo empresa den registro komersial dentro di 7 dia despues di komienso di bo aktvidatnan empresarial. Konkretamente esaki ta nifiká ku na momentu ku bo sali dilanti ku bo empresa (por ehèmpel: bo ta sera un kontrato ku un proveedor; na nòmber di bo futuro empresa bo ta manda buska inventario òf bo ta pidi un pèrmit). Den tur e kasonan aki bo a hasi un komienso ku bo aktividatnan empresarial i pues bo mester ta inskribí i bo mester ta disponé di un number di Kámara di Komèrsio.

  • Kiko ta e gastunan pa un inskripshon?

    E gastunan ta diferensiá di kaso pa kaso. Lei ta mantené un tabla di 13 eskala (di eskala 1 te ku 13) ku kada un tin un suma di gastunan di inskripshon. E suma mínimo ta 65 USD i esun máksimo ta 600 USD. E altura di e kapital ku bo mes ta kontribuí ta e indikashon den kua eskala bo empresa ta kai. Klek AKI pa e tabla ku e tarifanan korespondiente (Nederlands).

    Fundashon, asosashon i Fundashon Fondo Privá (sin empresa) nunka no tin kapital aportá; konforme lei outomátikamente nan ta kai den eskala 4.     

  • Kon i ki ora mi ta haña un number di Kámara di Komèrsio (KvK)?

    Despues ku bo entregá bo petishon pa inskripshon nan ta kontrolá si esaki ta kompletu. E mester kumpli ku tur legislashon ku ta aplikabel. Si bo inskripshon ta kompletu, nan ta inskribí bo empresa den registro komersial. E ora ei bo ta haña un number di KvK. E number aki ta úniko i e ta keda semper mará na bo empresa. E number aki ta pará riba bo resúmen i semper bo mester not’é riba tur bo pòst saliente (manera faktura, oferta ets.).   

  • Mi tin ku pasa personalmente òf mi por inskribí mi empresa pa medio di imeil?

    Semper un inskripshon mester tuma lugá personalmente. Mester entregá e formularionan legal di Kàmara ku firma original bou di nan. Nos no konosé firma elektróniko (ainda) na Boneiru, p’esei tin e obligashon pa entregá formulario original (físiko).

    Si bo ke inskribí un persona hurídiko, bo no mester pasa serka nos. Notario ta atendé ku e inskripshon.   

O tuma kontakto ku nos