Registro komersial ta un registro públiko kaminda tur empresa, persona hurídiko i sukursal ta notá. Lei ta preskribí ku bo mester paga un suma na momentu di inskripshon i despues anualmente un suma, e asina yamá kontribushon anual. Altura di e suma ta dependé di e kapital ku bo a hinka den e empresa. Mas tantu kapital, mas tantu e kontribushon ta (empresa mas grandi ta karga e peso mas pisá). Lei konosé awor 13 eskala, kuminsando na 80 USD i terminando na 600 USD pa eskala 13. AKI bo ta haña un bista riba e repartishon di eskala, inkluso e gastunan adishonal (Nederlands). Si riba 1 di yanüari bo ta aktivo komo empresa den registro komersial, bo ta obligá pa kumpli ku e kontribushon anual pa e aña ei. Bo ta risibí un faktura di KvK den luna di yanüari òf febrüari. Dentro di 30 dia bo tin ku paga e faktura aki; esaki ta un eksigensia di lei.

Preguntanan ku nan ta hasi hopi tokante kontribushon anual

  • Mi ta obligá pa paga kontribushon anual?

    Si riba 1 di yanüari di tal aña bo empresa ta inskribí komo aktivo den registro komersial, pa lei bo ta obligá pa paga e kontribushon pa e aña ei. No ta importá si ta pa henter aña bo ta inskribí òf solamente pa un parti di e aña. E fecha di referensia di 1 di yanüari ta desisivo. Tambe si bo tin un BV òf NV, pero temporalmente bo a hasi’é inaktivo, bo mester paga e kontribushon anual. Pa mas informashon tokante e tópiko aki, tuma kontakto ku nos via adrès di imeil administratie@kvkbonaire.com òf via +599 7175595.

  • Kiko ta pasa ku e kontribushon?

    E kontribushon ta pa laga e registro komersial na Boneiru funshoná. Un biaha pa aña bo ta paga un suma. Ku e sèn aki ta paga tur kos pa laga e registro funshoná na KvK. Kambionan ku bo hasi despues di inskripshon ta grátis.

  • Tin un fecha final pa paga aplikabel?

    Si, lei ta stipulá ku dentro di 30 dia después di a risibí e faktura mester a hasi e pago. Tur aña na komienso di yanüari nan ta traha e faktura i mand’é. Si nos tin un adrès di imeil di bo nos ta manda e faktura einan. Sino nos ta mand’é na e adrès di establesimentu via di pòst. Pa mas tardá den luna di yanüari òf febrüari nos ta manda e faktura. Promé ku fin di mart e faktura mester ta pagá. 

  • Kiko ta pasa si mi no paga?

    Si bo no paga esei por tin konsekuensia serio pa bo empresa. Si bo no paga na tempu nos ta hasi uso di un ofisina di kobransa i/òf un ‘deurwaarder’. E gastunan enbolbí ku esakinan ta bini riba e suma ku ta habrí. Pues bo tin desbentaha di esaki.

    Asta t’asina ku un wes por disolvé un persona hurídiko despues di un retraso di pago di un aña. Konkretamente esaki ta nifiká ku e ora ei bo empresa no ta eksistí mas. 

  • Kiko mi tin ku hasi si mi no a risibí un faktura?

    Si den luna di yanüari òf febrüari bo no a risibí un faktura algu a bai robes den entrega di esaki. Den un kaso asina manda un imeil na: administratie@kvkbonaire.com.

O tuma kontakto ku nos