Promé ku tur kos mester evitá subida di tarifa di awa i koriente

Desde komienso di 2018 e tarifanan pa koriente a subi enormemente. Esaki a kondusí kaba na hopi inkietut dentro di komunidat boneriano. Sin e subsidio nesesario di gobièrnu di Reino entrante 1 di aprel di e aña aki e sistema legal nobo lo bai kondusí na mas oumentu inakseptabel di gastunan di e nesesidatnan primario di bida aki. Den bista di Kámara di Komèrsio esaki no ta akseptabel. Huntu ku e partnernan den Diálogo Sosial (kolaborashon entre gobièrnu lokal,  organisashonnan di doñonan di trabou i sindikatonan) a urgi Kolegio Ehekutivo di Entidat Públiko Boneiru pa aktua rápido i dirigí pa evitá e oumentunan aki.

Pa hopi empresario e subida ku 24% entrante 1 di yanüari ya kaba tabata un sla den nan kara, spesialmente tambe pa motibu di e momentu di partisipá esaki (a komuniká esaki dia 29 di desèmber 2017). Espektativa ta ku e tarifanan pa awa i elektrisidat lo subi mas ainda entrante 1 di aprel. I esaki mientras ku preis di hopi produkto i servisio ta stipulá kaba i hopi biaha ta pagá kaba den pasado, promé ku a komuniká tokante e subida di preis (por ehèmpel un kamber di hotèl). Ta imposibel pues pa ainda bolbe kalkulá e subidanan aki den e preis pa e kliente. Esaki ta nifiká ku e tin ku sali for di márgen di empresarionan, ku tur konsekuensia ku esaki por trese kuné. Finalmente mas lat den e aña aki lo kalkulá e gastunan di e oumentunan aki tòg si den e preisnan pa kliente. Esaki ta nifiká un gólpi nobo pa e konsumidó ku pues ta haña dòbel sla. Pa e motibu aki e sirkumstansianan sosial-ekonómiko riba nos isla lo bai resultá mas bou di preshon ainda.

Kámara di Komèrsio no ta para tras di e subidanan di preis i ta hasi un yamada riba tantu Entidat Públiko Boneiru pa inmediatamente tuma akshon konkreto. E tempu di skirbi karta bai bini lamentablemente a pasa. Mester tuma medida ku por sòru pa e bòm sosial-ekonómiko aki  no bai okashoná mas daño.

Kámara di Komèrsio ta di opinion ku promé ku tur kos na e momentunan aki mester evitá subida di tarifa di awa i koriente ku ta nesesidatnan primario di bida!