Por repartí infrastruktura di Boneiru den diferente elemento: aeropuerto, haf, ret di kaminda i infrastruktura di ICT (teknologia di informashon i komunikashon).

Aeropuerto

Aeropuerto di Boneiru ta un aeropuerto internashonal, yamá Flamingo International Airport. E aeropuerto konosé un pista di aterisahe di kasi 3 km loke ta sufisiente pa por risibí tur tipo di avion. E kompanianan mas grandi ku ta bula pa Boneiru ta KLM, TUI, Delta Airlines i United Airlines. Banda di esei WestJet ta kuminsá ku buelo for di Toronto. E otro suidatnan ku ta direktamente alkansabel for di Boneiru ta Amsterdam, Miami, Houston, Atlanta i Newark. Kompanianan di aviashon mas chikitu (Divi Divi Air i EZ Air) ta bula den region pa Kòrsou i Aruba. For di einan tin numeroso posibilidat pa sigui ku otro kompanianan pa destinashonnan den Amérika Sentral i Suramérika. E aeropuerto konosé un zona pa stashoná outo ku durashon korto i largu i tin algun fasilidat i tienda. Kasi tur e kompanianan mas grandi di hür outo ta establesé na aeropuerto pa e servisio ku nan ta duna na nan klientenan.

Segun sifranan di Ofisina Sentral di Estadístika (CBS) na aña 2021 mas òf ménos 111.300 pasahero a biaha via aeropuerto di Boneiru.

Haf

Boneiru konosé algun haf. E haf mas importante di Boneiru tin dos waf i tin sufisiente profundidat pa e barkunan di mas grandi. Ta usa e wafnan pa tantu karga komo pasahero. Durante temporada haltu (high season) – novèmber te ku mart – hopi barku krusero ta mara na e wafnan aki. Karga ta yega Boneiru via un asina yamá sistema di ‘Roll-on Roll-off’: na Kòrsou ta pone kònteiner riba un treiler i na Boneiru mesora ta baha nan ku un trèker for di e barku. Esaki ta nesesario pasobra Boneiru no ta disponé di un kran grandi ku por baha e kònteinernan direktamente for di e barku. Esaki ta e motibu ku hopi karga ta bini via Kòrsou. Esaki ta un faktor ku empresarionan mester tene kuenta kuné.

Ret di kaminda

E ret di kaminda ta un kombinashon di kaminda di asfalt i kaminda di tera na nos isla. Prinsipalmente e parti meimei (Playa) i den direkshon mas na nort (Rincon) tin kaminda di asfalt. Aktualmente gobièrnu ta trahando riba algun rotònde pa stimulá siguridat i fluho di tráfiko i rònt di sierto skolnan tambe a drecha e kamindanan. Awor aki ta sigui traha riba un plan pa mehorá e infrastruktura di kaminda mas aleu.   

ICT

Pa medio di dos kabel bou di laman via Kòrsou i Miami, Boneiru ta konektá riba telekomunikashon ku sobrá di mundu. Banda di esei proveedornan na Boneiru ta kumpra kapasidat internashonal (IP transit) serka proveedornan na Kòrsou; hopi biaha esaki ta bai tambe ku konekshonnan di mikroonda entre Kòrsou i Boneiru. Boneiru konosé tres proveedor di telefonia selular, un proveedor di telefonia fiho, dos proveedor di internèt fiho i tres proveedor di televishon. Pa motibu di kresementu di poblashon e demanda pa kapasidat ketu bai ta sigui oumentá fuertemente. Usuarionan final hopi biaha ta preokupá pa e manera ku kalidat i preis di telefonia selular i internèt fiho ta relatá ku otro.

Hasi negoshi na Boneiru

O tuma kontakto ku nos