E sektor mas importante di ekonomia boneriano ta i ta keda turismo. Hopi hende ta traha den turismo òf den un di e sektornan di suministro. Boneiru ta purba diversifiká ekonomia pa medio di invertí den agrikultura i e sektor di dunamentu di servisio. Aktividat empresarial na Boneiru ta krese tur aña ku un promedio di 2,8% pa aña. Kámara di Komèrsio ta ripará esaki tambe den oumentu di e kantidat di empresa na Boneiru ku ta inskribí den registro komersial.

E entrada promedio na nos isla ta rònt di un promedio di $25.500 pa persona. Pa motibu di e krísis di COVID-19 e entrada promedio aki lo a baha den e aña tras di lomba. Banda di esei forsa di kompra di habitantenan di nos isla a mustra un bahada leve (fuente: Trends in de Caribbean Netherlands 2020, CBS).

Sektornan

Na aña 2020 Kámara di Komèrsio a tene un enkuesta representativo bou di empresarionan na Boneiru. For di esaki a resultá ku turismo, konstrukshon i sektor di servisio ta e sektornan mas importante na nos isla.

Den e enkuesta mas ku 42% di e empresanan a indiká di ta traha den e sektor turístiko. Aki mester opservá ku e sektor aki tambe ta un forsa ku ta duna impulso na ekonomia boneriano. Hopi sektor den ekonomia ta suministradó òf nan tin un dependensia di e sektor aki.

Turismo ta e sektor mas grandi dentro di ekonomia di Boneiru. Den e investigashon di Ofisina Sentral di Estadístika (CBS) ‘Trends in de Caribbean Netherlands 2019’ e parti di turismo ta aproksimadamente 38,4%. Den e enkuesta pues esaki ta un tiki mas haltu. Sinembargo ta definí e sektor aki na un manera amplio. Pa e motibu aki den e enkuesta a pidi tur empresa pa dentro di e sektor indiká kua ta e ramo di negoshi spesífiko dentro di kua nan ta traha. E tabèl aki bou ta indiká ku e partisipantenan na e enkuesta ta bunita repartí den e sektor turístiko.

Impuesto

Boneiru ta un entidat públiko di Hulanda. Esaki ta nifiká ku na Boneiru tin otro lei i regla ku ta na vigor kompará ku Hulanda Oropeo. Esaki ta konta pa impuesto tambe. E desviashonnan mas importante i mas remarkabel for di Hulanda ta impuesto riba ganashi (tarifa 0%), impuesto riba dividendo (tarifa 5%) i impuesto riba sueldo (30,4%). Mas aleu Hulanda Karibense konosé un impuesto riba propiedat inmóbil ku ta aplikabel. E tarifa aki ta diferensiá pa hende privá (partikulir) i empresanan. Pa e motibu aki ta bon pa via e lenk informá bo mes tokante e tarifanan i impuestonan vigente di nos gobièrnu lokal. 

Hasi negoshi na Boneiru

O tuma kontakto ku nos