Naturalmente semper por sosodé ku bo no ke sigui ku bo empresa. Bo ke stòp definitivamente ku bo empresa of organisashon. Dentro di 7 dia bo tin ku pone Kámara di Komèrsio na altura di esaki. Den buki 2 di Kódigo Sivil BES (Burgerlijk Wetboek BES) nan ta deskribí kua ta e trámitenan ku mester hasi, kiko abo komo empresario/dirigente mester hasi i kiko bo tin ku entregá pa realisá kanselashon for di registro komersial. Download mas informashon tokante e prosedura spesífiko den e dokumento akí.

Hasi bo empresa temporalmente inaktivo den tráfiko ekonómiko

Por sosodé tambe ku temporalmente bo tin ku stòp ku bo empresa. Den e kaso ei e organisashon no ta tuma parti mas na e tráfiko ekonómiko i e organisashon ta bira inaktivo. E ora ei bo ta anulá e empresa, pero bo no ta disolv’é. Di e manera ei ta kualifiká e empresa tambe den registro komersial. Esaki ta nifiká ku bo tin ku sigui paga e kontribushon anual pa bo empresa sí. Despues eventualmente bo por aktivá bo empresa atrobe.

Ta bon pues pa informá tokante kua prosedura ta mas adekuá den bo situashon. Pa esaki semper bo por haña informashon adishonal serka Kámara di Komèrsio. Gustosamente un empleado ta sinta ku bo na mesa pa pasa den e formularionan i kontestá bo preguntanan.

Bo por hasi e trámitenan menshoná akí riba digitalmente tambe den registro komersial di Boneiru. Pa anulashon òf disolushon di un empresa, klek AKINAN. Pa mèldu un kambio ta importante ku bo ta un persona outorisá i ku bo por haña akseso ku bo ‘login’ i bo ‘password’ korespondiente. Pa sòru ku ta solamente personanan outorisá ta meldu kambio, ta otorgá un ‘access code’ (kódigo di akseso) na e personanan akí. Pa hasi petishon pa e ‘access code’ (kódigo di akseso) akí bo ta klek AKINAN pa via bo ‘login’ pidi un kódigo nobo den e sistema di registro komersial.

Den kaso ku bo no ta disponé di un kòmpiuter i skèner na kas, bo por pasa na Kámara di Komèrsio pa yena bo informashonnan den nos ‘Kiosko Digital’. Na e momentu ei empleadonan di Kámara di Komèrsio gustosamente ta dispuesto pa duna bo asistensia ku yenamentu online di bo informashonnan den registro komersial.