Pa ta aktivo na Boneiru komo empresario bo mester ta den poseshon di un òf mas pèrmit. Nos gobièrnu lokal (Entidat Públiko Boneiru) ta duna e pèrmitnan aki. Pa kada empresa ta obligatorio pa disponé di un pèrmit di establesimentu pa por kuminsá ku e empresa. Banda di esei kisas algun pèrmit adishonal mas ta nesesario, dependiente di e aktividatnan ku bo ta bai desplegá. E pèrmitnan mas komun riba e tereno aki ta: pèrmit di medio ambiente, pèrmit di Bibida i HÓREKA, pèrmit pa restorant i pèrmit pa bende riba kaya. E orarionan di Entidat Públiko Boneiru pa pèrmit di negoshi bo ta haña akinan.

Pèrmit di establesimentu

E Lei establesimentu di empresa BES – Wet vestiging bedrijven BES – (klek akinan pa legislashon aktual) ta obligá empresanan pa disponé di un pèrmit di establesimentu pa por hasi negoshi na Boneiru. Pa optené un tal pèrmit tin tres eksigensia den lei. Pa bini na remarke pa un pèrmit bo tin ku kumpli ku lo siguiente:    

1. Bo mester tin sufisiente konosementu di e aktividatnan ku bo ta bai desplegá;
2. Bo mester tin sufisiente kapital pa e aktividatnan ku bo ta bai desplegá;
3. Bo no mester aktua en pugna ku interes general.

E eksigensianan den lei menshoná aki riba den práktika kasi nunka ta kondusí na problema. E aktividatnan ku ta papiando di dje ta e aktividatnan ku ta inskribí den registro komersial.

Hasi petishon pa pèrmit di establesimentu

Pa hasi petishon pa e pèrmit, Kámara di Komèrsio a hasi palabrashon ku Entidat Públiko Boneiru. E palabrashon aki, entrante 1 di aprel 2021, ta enserá ku un empresario mester entregá un ekstrakto resien di Kámara di Komèrsio di ménos ku shete (7) dia di trabou bieu, huntu ku e petishon. Mediante e palabrashon aki por hasi e prosedura pa haña e pèrmit serka Entidat Públiko Boneiru mas kòrtiku.

Otro pèrmitnan

Banda di e pèrmit di establesimentu por ta ku bo tin mester di mas pèrmit pa habri bo negoshi. Esaki ta dependiente di e aktividatnan ku bo ta nota den registro komersial. Klek akinan pa un bista general di tur e pèrmitnan disponibel di negoshi pa Boneiru. E lokèt pa empresa por yuda bo ku inventarisashon di e pèrmitnan nesesario.

Kuminsá komo empresario for di Hulanda Oropeo i for di eksterior.

E lokèt pa empresa ta duna asistensia tambe na empresarionan ku ke kuminsá for di pafó di Boneiru. Pa nan hopi biaha ta difísil pa komprendé e pasonan ku mester tuma pa kuminsá ku un negoshi na Boneiru i kiko ta nesesario pa bin biba na Boneiru. Den e dokumentu aki bo ta haña kua ta e pasonan ku bo tin ku tuma, kua ta e dokumentunan ku ta nesesario i kon largu por spera ku e tempu pa pasa den e proseso di e pasonan aki lo ta. Den kaso ku e bista general aki tòg ainda ta lanta sierto preguntanan, e ora ei semper bo por tuma kontakto ku bis@kvkbonaire.com.