Legislashon i regulashon nobo entrante 1 di yanüari 2022

Entrante 1 di yanüari 2022 ta renobá Lei di Kámara di Komèrsio i Industria BES, Lei di Registro Komersial 2009 BES, Dekreto di Registro Komersial 2009 BES i Dekreto Elektoral pa Kámaranan di Komèrsio i Industria BES.

E kambionan den e legislashon i regulashon nobo ta prinsipalmente aplikabel pa:

  • Elekshon di miembronan di direktiva di Kámara di Komèrsio;
  • Tareanan di Kámara di Komèrsio;
  • E kompensashonnan pa algun trabou i produkto di Kámara di Komèrsio.

 

Modernisashon di e legislashon i regulashon akí ta hasi posibel pa Kámara di Komèrsio ehekutá su tareanan na un manera mas efisiente i efikas segun un sistema ku ta kuadra dentro di e espíritu di tempu aktual. Akí bou nos ta splika e kambionan mas importante. Pa un bista general kompleto nos ta referí bo na e tekstonan di e legislashon i regulashon en kestion.

Elekshon di miembronan di direktiva

Algun kambio importante tin di haber ku elekshon di miembronan di direktiva di Kámara di Komèrsio. No ta bai hasi distinshon mas entre representantenan di empresa grandi i empresa chikí. Di awor en adelante elekshon ta tuma lugá kada tres aña i no mas anualmente. Durante e elekshonnan akí kada biaha ta skohe henter e direktiva na lugá di kada bes un parti di e direktiva.

Entre 1 i 14 di novèmber kandidatonan por pone nan mes elegibel. Na momentu ku ta nesesario ku mester tene un elekshon, lo tene esaki dentro di 30 dia despues di e periodo akí. Si durante e periodo entre dos elekshon tin miembro di direktiva ta renunsiá òf mester renunsiá, lo no yama elekshon, tanten ku sobra minimalmente 3 miembro di direktiva. Si sobra ménos ku 3 miembro di direktiva, Kolegio Ehekutivo di Entidat Públiko Boneiru lo apuntá un miembro di direktiva. Solamente ora e kantidat di kandidato ta mas tantu ku e kantidat di posishon den direktiva, ta nesesario pa vota. Pa e votashon ta anunsiá e konvokashon pa bin vota solamente den korantnan lokal i otro kanalnan; lo no distribuí karchi pa bin vota mas.

Tarea i kompetensia

Ta amplia e tareanan di Kámara di Komèrsio ku dunamentu di informashon i konseho na Minister di Asuntunan Ekonómiko i Klima, por ehèmpel komo sosten pa maneho ekonómiko di e ministerio. Banda di esei Kámara di Komèrsio ta keda responsabel pa Registro Komersial i pa dunamentu di konseho tokante empresariado.

Presupuesto di Kámara di Komèrsio

Den e legislashon nobo mas aleu a inkluí un parágrafo tokante e siklo di prepupuesto i e supervishon riba esei. Den e lei a inkluí fechanan konkreto di entrega pa presentashon di e presupuesto na Kolegio Ehekutivo i na Minister di Asuntunan Ekonómiko i Klima. Esaki ta konta tambe pa entrega di e kuenta anual ouditoriá.

Tarifa pa suma di registrashon i kontribushon anual

E suma di registrashon i tarifanan pa e kontribushon anual pa organisashonnan ku ta registrá den Registro Komersial ta bira dependiente di e forma hurídiko i no ta keda stipulá mas a base di e kapital emití. Pa kompanianan anónimo (N.V.) i kompanianan privá (B.V.) ta hasi distinshon entre kompanianan anónimo chikitu i grandi i kompanianan privá chikitu i grandi a base di e kantidat di funshonarionan ku ta registrá. Kompanianan anónimo i kompanianan privá chikitu (ku solamente un (1) funshonario registrá den Registro Komersial) ta kai den un kategoria mas abou ku kompanianan anónimo i kompanianan privá ku tin vários funshonario registrá. Pa por kalkulá e kontribushon anual mester multipliká e suma básiko ku e peso ku ta aplikabel pa e forma hurídiko ei. Konforme e areglo finansiero e suma básiko entrante yanüari 2022 ta $ 60,–.

Dia 29 di april 2022 a adaptá e suma básiko relashoná ku e preokupashonnan di empresarionan individual i representantenan di interes kolektivo i e fitbèk ku nan a duna tokante altura di e tarifanan nobo pa e kontribushon anual. E tarifa básiko tabata originalmente $ 80,-. Empresarionan ku ya kaba a paga un kontribushon anual òf ku durante aña 2022 a hasi un inskripshon nobo lo risibí restitushon di e suma. Tokante esaki Kámara di Komèrsio lo aserká e empresarionan aktivamente.

Akí bou bo ta haña un deskripshon general di e tarifanan akí pa e kontribushon anual repartí segun forma hurídiko.

jaarlijkse_bijdrage_kvk_bonaire

E kontribushon anual di un sukursal ta igual ku e kontribushon anual di e entidat prinsipal.

Tarifa pa otro servisio

E tarifanan pa e otro servisionan di Kámara di Komèrsio ta komo lo siguiente:

Legislashon i regulashon relevante

Wet KvK BES 2022

Kiesbesluit KvK BES 2022

Handelsregisterwet BES 2022

Handelsregisterbesluit BES 2022

Financiële regeling Handelsregister BES

Kambio di e Areglo finansiero registro komersial BES 2022 (stcrt-11432)

Ekstrakto Históriko

Kámara di Komèrsio por otorgá bo un bista general di e kambionan ku a surgi durante eksistensia di bo empresa òf organisashon. Esakinan ta por ehèmpel e kambionan di funshonario òf kambio di nòmber komersial. Bo por hasi esaki pa henter e eksistensia di e organisashon òf pa un periodo mas limitá. Pa optené tal ekstrakto bo por manda un email na handelsregister@kvkbonaire.com i hasi menshon di nòmber i number di Kámara di Komèrsio di e organisashon.

Deklarashon tokante informashon den Registro Komersial

Kámara di Komèrsio por duna bo tambe un bista general di informashonnan den registro komersial. Ta trata e ora ei di por ehèmpel un bista general di tur dirigente òf tur adrès bieu òf solamente un kontesta riba e pregunta si un persona riba un sierto fecha tabata dirigente outorisá òf tur adrès kaminda un empresa tabata establesé. Pa optené tal deklarashon bo por manda un email na handelsregister@kvkbonaire.com i hasi menshon di nòmber i number di Kámara di Komèrsio di e organisashon i e pregunta spesífiko ku bo tin.

Lista di empresa

Kámara di Komèrsio ta entregá lista di empresa tambe na empresarionan. Den registro komersial a inkluí e aktividatnan empresarial di empresanan. E aktividatnan akí ta repartí den un aktividat prinsipal i maksimalmente tres aktividat sekundario. A hasi e repartishon akí a base di e Klasifikashon Empresarial Standarte (Standaard Bedrijfsindeling – SBI) di Ofisina Sentral di Estadístika na Hulanda. E repartishon akí a keda aseptá internashonalmente i nan ta us’é mundialmente. A base di e repartishon akí bo por pidi informashon di empresanan ku ta ubiká na Boneiru. Por ehèmpel, un bista general di tur ‘carwash’ òf tur panadero na Boneiru. Pa kada empresa bo ta paga $ 0,56 pa e informashonnan ku nan ta entregá den un fail di Excel na bo (ku un mínimo di $ 8,38 pa kada pedido). Pa hasi petishon pa un lista di empresa, bo ta klek AKINAN.

Sertifikado di Orígen

Kámara di Komèrsio ta otorgá un ‘Sertifikado di Orígen’ na empresarionan ku ta produsí merkansia na Boneiru. Empresarionan por usa e sertifikado akí na momentu di eksportashon pa proba ku e merkansia ta trahá na Boneiru. Pa optené un sertifikado asina bo por manda un email na handelsregister@kvkbonaire.com. Den esaki bo ta indiká e tipo di merkansia, índole di e merkansia i e kantidat di merkansia, inkluso e preisnan. Seguidamente ta pone e informashon den e sertifikado. Despues di a paga e gastunan pa e sertifikado akí bo por pasa tum’é na Kámara di Komèrsio.

Hür espasio pa reuní

Kámara di Komèrsio ta disponé di un sala di treinen i algun espasio pa reuní. Pa e tarifanan aktual i e disponibilidat bo por tuma kontakto ku administratie@kvkbonaire.com. Menshoná bon kla e kantidat di persona, e fecha i e ora di bo enkuentro. E ora ei rápidamente bo ta haña un reakshon ku disponibilidat i tarifa pa hür di e espasio pa reuní. Por hasi palabrashon tambe tokante e catering deseá.

 

FAQ

  • Dikon un oumento di tarifa?

    Tin kestion di un ahuste di tur tarifa pa promé biaha despues di mas ku 10 aña; algun tarifa ta subi, algun ta baha; e kambionan tin diferente efekto riba e diferente tiponan di forma hurídiko ku ta registrá den Registro Komersial.

  • Ken a disidí esaki?

    E kambionan di tarifa ta formulá den kambionan di lei; naturalmente na e manera di kustumber a tuma desishon tokante esaki den parlamento hulandes;

    No ta (direktiva di) Kámara di Komèrsio mes ta tuma desishon tokante tal kambionan.

  • Ken ta stipulá e tarifanan?

    Ministerio di Asuntunan Ekonómiko i Klima ta stipulá e tarifanan;

    No ta (direktiva di) Kámara di Komèrsio mes ta tuma desishon tokante tal kambionan.

  • Ken ta tene supervishon riba Kámara di Komèrsio?

    Ministerio di Asuntunan Ekonómio i Klima ta tene supervishon riba funshonamentu di Kámara di Komèrsio.

  • Kon e proseso di toma di desishon tras di e legislashon nobo tabata?

    (For di 2015) e Ministerio a konsultá ku Kámara di Komèrsio i interesadonan lokal tokante kambionan nesesario i deseá den e lei. Na momento ku e tekstonan den forma di konsepto tabata disponibel, tabatin konsulta atrobe i finalmente a hiba konsulta via internèt, kaminda tur hende por a reakshoná;

    Originalmente e idea tabata ku e kambionan di lei akí lo a keda implementá hopi mas promé, pero esaki a sufri retraso pa motibu ku otro tópikonan dentro di e proseso di legislashon a haña mas prioridat.

  • Kiko Kámara di Komèrsio ta bai hasi ku e entradanan èkstra?

    Dependiente di kon e situashon nobo ta resultá realmente den práktika, na e momento akí e ekspektativa ta ku Kámara di Komèrsio por ehekutá su tareanan ku e lei nobo ta verwagt;

    E Ministerio di Kámara di Komèrsio ke pa Kámara di Komèrsio funshoná mas integral i pa prinsipalmente riba tereno di duna informashon i sosten na empresarionan Kámara di Komèrsio por hasi mas sin ku tin mester di un supsidio anual di Entidat Públiko Boneiru pa esei;

    Den su totalidat Kámara di Komèrsio no ta verwagt di tin mas entrada òf di tin apénas mas entrada ku awor akí ta e kaso; naturalmente mester wak ki efekto e kambionan lo tin definitivamente; en todo kaso e meta no ta pa diripiente Kámara di Komèrsio ta haña mas sèn pa saka, no tin ningun motibu pa esei.

  • Dikon tin un diferensia ku e otro islanan di Karibe (Hulandes)?

    Islanan BES di un banda i Aruba, Kòrsou i Sint Maarten di un otro banda tur kuater tin nan propio legislashon i regulashon i pues no tin nada ku por bisa tokante e diferensianan den legislashon i kua efekto esaki tin riba e tarifanan;

    En todo kaso ta klarito ku tin diferensia grandi pa loke ta trata eskala di e islanan, loke (parsialmente) lo por ta un splikashon.

  • Dikon finansiamentu di Kámara di Komèrsio ta otro for di Hulanda?

    Legislashon i historia ta hopi diferente; por ehèmpel semper islanan BES a konosé un direktiva di Kámara di Komèrsio elegí, miéntras esaki na Hulanda no ta e kaso;

    Na Hulanda algun aña pasá a skohe pa anulá e kontribushon anual; esaki a sosodé komo kompensashon pa algun medida di impuesto pa empresario. Esaki no ta e kaso na islanan BES. Na Hulanda tin sí un pago pa registrashon pa un solo biaha ora ku registrá un organisashon pa promé biaha den Registro Komersial.

  • Kon a komuniká esaki ku e organisashonnan registrá?

    For di kuminsamentu di desèmber 2021 Kámara di Komèrsio ta komuniká via email, komunikado pa prensa, e propio wèpsait i medionan sosial tokante de kambionan di lei ku ta na kaminda.