KAMBIO DI LEGISLASHON PA KÁMARA DI KOMÈRSIO I REGISTRO KOMERSIAL ENTRANTE 1 DI YANÜARI 2022

Entrante 1 di yanüari 2022 ta renobá Lei di Kámara di Komèrsio i Industria BES, Lei di Registro Komersial 2009 BES, Dekreto di Registro Komersial 2009 BES i Dekreto Elektoral pa Kámaranan di Komèrsio i Industria BES.

E kambionan den e legislashon i regulashon nobo ta prinsipalmente aplikabel pa:

• Elekshon di miembronan di direktiva di Kámara di Komèrsio;
• Tareanan di Kámara di Komèrsio;
• E kompensashonnan pa algun trabou i produkto di Kámara di Komèrsio.

Modernisashon di e legislashon i regulashon akí ta hasi posibel pa Kámara di Komèrsio ehekutá su tareanan na un manera mas efisiente i efikas segun un sistema ku ta kuadra dentro di e espíritu di tempu aktual. Dentro di poko lo publiká un bista general di e kambionan den legislashon riba wèpsait di Kámara di Komèrsio, inkluso e lista di preis nobo pa servisionan di Kámara di Komèrsio. Akí bou nos ta splika e kambionan mas importante. Pa un bista general kompleto nos ta referí bo na e tekstonan di e legislashon i regulashon en kestion.

Elekshon di miembronan di direktiva

Algun kambio importante tin di haber ku elekshon di miembronan di direktiva di Kámara di Komèrsio. No ta bai hasi distinshon mas entre representantenan di empresa grandi i empresa chikí. Di awor en adelante elekshon ta tuma lugá kada tres aña i no mas anualmente. Durante e elekshonnan akí kada biaha ta skohe henter e direktiva na lugá di kada bes un parti di e direktiva.

Tarea i kompetensia

Ta amplia e tareanan di Kámara di Komèrsio ku dunamentu di informashon i konseho na Minister di Asuntunan Ekonómiko i Klima, por ehèmpel komo sosten pa maneho ekonómiko di e ministerio. Banda di esei Kámara di Komèrsio ta keda responsabel pa Registro Komersial i pa dunamentu di konseho tokante empresariado.

Tarifa

E tarifanan pa e kontribushon anual pa organisashonnan ku ta registrá den Registro Komersial ta bira dependiente di e forma hurídiko i no ta keda stipulá mas a base di e kapital emití. Pa kompanianan anónimo (N.V.) i kompanianan privá (B.V.) ta hasi distinshon entre kompanianan anónimo chikitu i grandi i kompanianan privá chikitu i grandi a base di e kantidat di funshonarionan ku ta registrá. Kompanianan anónimo i kompanianan privá chikitu (ku solamente un (1) funshonario registrá den Registro Komersial) ta kai den un kategoria mas abou ku kompanianan anónimo i kompanianan privá ku tin vários funshonario registrá.

Mas informashon

Dentro di poko Kámara di Komèrsio ta publiká riba su wèpsait un bista general di e konsekuensianan di e legislashon i regulashon nobo i e lenknan ku ta bai na e legislashon i regulashon ku ta aplikabel. Ta importante pa tur empresario tuma nota di e legislashon i regulashon nobo akí.