Kámara di Komersio Boneiru pronto ta manda fakturanan pa inskripshon den e Registro Komersial ku anteriormente no a wòrdu mandá

Den e siman di promé di ougùstùs Kámara di Komersio Boneiru lo manda via mail e fakturanan pa e kontribushon anual pa 2022 pa empresa, asosiashon i fundashon ku no a risibí esakinan ainda. Riba 14 di yüli, un parti di e entidatnan inskribí a risibí nan faktura pa 2022 kaba. Dor di un fayo tékniko imprevisto riba e dia ei e sistema a manda pa un grupo di entidat e mesun faktura múltiple biaha i pa un otro grupo no a manda netamente nada. Asina ku a ripará esaki Kámara di Komersio a para e proseso di fakturá i a saka via medionan di komunikashon un petishon pa paga e faktura risibí solamente un biaha.

Miéntras tantu a drecha e fayo tékniko akí. Kámara di Komersio ta lamentá e marcha di asuntu akí i tin konfiansa ku e mesun situashon lo no ripití atrobe den futuro. Den e siman di promé di ougùstùs lo manda finalmente e fakturanan di Kámara di Komersio ku no a manda anteriormente.

E fakturanan ta bai tambe di nobo pa e direkshonnan di mail ku segun e sistema di Registro Komersial online riba 14 di yüli no a risibí esaki. Por tin diferente motibu ku esaki a tuma lugá: e baki di pòst di e direkshon konserní por tabata (temporalmente) yen, pa un ke otro motibu e momentu ei no por a entregá e mensahe (undeliverable) òf a posponé e entrega (deferred mail). Pues ta posibel ku e mesun personanan akí ta haña e impreshon ku tòg atrobe nan ta risibí e mesun faktura di nobo den nan baki di pòst. Na e grupo akí Kámara di Komersio ta ripití su petishon pa paga e faktura ku a risibí solamente un biaha.

Pa buena marcha Kámara di Komersio ta enfatisá ku e mensahe relashoná ku e faktura ta bai pa e direkshon di mail di e entidat registrá den Registro Komersial. E faktura pa e entidatnan ku no a registrá un direkshon di mail den Registro Komersial lo wòrdu mandá ku pòst.

Kámara di Komersio ta enfatisá ku personanan ku ta registrá komo direktor òf ehekutivo pa múltiple entidat, ta risibí pa kada entidat inskribí un mensahe di mail separá ku e faktura. Si den kaso di e promé ròndu nan a risibí múltiple faktura pa unu òf mas entidat, ta di hopi importansia pa nan kontrolá si pa kada entidat inskribí nan a risibí un faktura. Tin un probabilidat ku direktor òf ehekutivonan ku ta uza e mésun direkshon di mail pa múltiple entidat registrá por bolbe risibi un mail ku faktura ku nan a risibí riba 14 di yüli kaba paso e sistema no por distinguí ta kua faktura a wordu mandá anteriormente. Kámara di Komersio un biaha mas ta ofrese su sinsero diskulpa pa e inkonveniensa aki.

Naturalmente nos ta hasi tur loke nos por pa sòru ku entidatnan inskribí no ta risibí pa di dos biaha un faktura. Esaki ta konta tantu pa e entidatnan ku riba 14 di yüli a risibí un mensahe di mail ku faktura komo pa entidatnan ku riba nan propio inisiativa a aserká ofisina di Kámara di Komersio pa paga e Kontribushon Anual 2022. Den kaso ku mientrastantu pago di e faktura akí a tuma lugá kaba, por konsiderá e faktura akí komo no mandá.

Kámara di Komersio normalmente ta fakturá e kontribushon anual na kuminsamentu di aña. E kontribushon akí ta legalmente obligatorio pa tur empresa òf organisashon ku ta inskribí den e Registro Komersial di Boneiru. E proseso di fakturá den 2022 a haña retraso pa motibu di introdukshon di tarifanan nobo. E tarifanan nobo no ta basá mas riba e kapital invertí, pero riba e forma hurídiko di e entidat i ta kondusí pa un kantidat grandi di entidat na un oumento. Despues di intervenshon di Kámara di Komersio e Minister di Asuntu Ekonómiko i di Klima a redusí e tarifanan akí algu na aprel 2022. Pa e motibu akí tabata resientemente numa ku a generá e fakturanan pa 2022 dor di e sistema Registro Komersial online.

Pa pregunta tokante e fakturanan, pero tambe tokante tarifanan nobo por tuma kontakto ku Kámara di Komersio via administratie@kvkbonaire.com. Informashon ekstenso tokante esakinan ta disponibel tambe riba e wèpsait di Kámara di Komersio www.bonairechamber.com.