PARTISIPASHON NA FRED expo 2022

Na nòmber di sektor privá Kámara di Komèrsio Boneiru i BONHATA ta bai representá Boneiru na e Flinx Recruitment Expo Dutch Caribbean (FRED expo) dia 29 di òktober binidero na Rotterdam. Meta di e bolsa akí ta pa drenta den kontakto ku kandidatonan ku ta interesá den un transishon pa Boneiru.

Ámbos organisashon lo presentá vakaturanan konkreto na e bolsa. Ta trata akí di prinsipalmente kandidatonan ku un formashon HBO i universitario i ku funshonnan korespondiente. Empresarionan ku tin vakatura habrí ku nan ke trese bou di atenshon di e bishitantenan di e FRED expo, por manda esakinan te pa mas tardá 7 di òktober 2022 pa bis@kvkbonaire.com. E ora ei nos lo pone e vakaturanan akí riba wèpsait di FRED expo www.fredexpo.com.

Kámara di Komèrsio Boneiru i BONHATA ta mira un nesesidat dentro di sektor privá pa yena vários funshon i pa e motibu akí konhuntamente a tuma e desishon pa hasi un esfuerso i duna forma i kontenido na un presensia na e bolsa. Intenshon di esaki ta pa – banda di e sektor gubernamental – representá sektor privá tambe komo opshon interesante pa kandidatonan.

Na e bolsa BONHATA ta bai duna un presentashon tokante trahamentu den sektor di hospitalidat na Boneiru.

Banda di reklutamentu di potensial kandidatonan, Kámara di Komèrsio Boneiru lo duna un presentashon tambe na e bolsa tokante e posibilidatnan ku empresariado na Boneiru tin pa ofresé.

E bolsa ya kaba a tuma lugá for di aña 2012 te ku aña 2019 i e kantidat di bishitantenan durante e último añanan tabata entre 600 pa 800. E aña akí e bolsa ta tuma lugá dia 29 di òktober 2022. Ámbos organisashon ta spera di a lanta interes serka empresarionan pa e próksimo edishonnan di e bolsa akí.

Den kaso ku organisashonnan tin interes pa laga presentá nan vakaturanan, nan por tuma kontakto ku  BIS@kvkbonaire.com.