Kámara di Komèrsio ta selebrá empresariado durante “Global Entrepreneurship week” 2022

Kámara di Komèrsio ta selebrá empresariado durante “Global Entrepreneurship week” 2022

“Global Entrepreneurship week” ta un siman kaminda tin desénas di míles di evento ku ta stimulá i inspirá empresarionan dentro di nan propio eko-sistema. Organisashonnan ta hasi uso di e siman akí pa organisá aktividat ku ta reflehá loke ta pasa durante aña den henter e organisashon. E aña akí lema di e ‘Global Entrepreneurship week’ ta jaar “Unleashing Ideas ”.

Pa e motibu akí Kámara di Komèrsio ta dediká atenshon spesial durante e ‘Global Entrepreneurship week’ pa medio di duna algun empresario ku a kaba di kuminsá ku nan negoshi un podio pa introdusí nan empresa nobo. Ta trata di  empresanan ku durante e último dos lunanan a inskribí den Registro Komersial i ku ta aktivo den diferente ramo empresarial.

Ku esaki Kámara di Komèrsio ta pone atenshon riba e ‘Global Entrepreneurship week’ ku mundialmente nan ta organisá durante e siman di 14 te ku 18 di novèmber 2022. Banda di esaki Kámara di Komèrsio ta selebrá e echo ku empresariado ta sumamente popular na Boneiru, mirando e interes ku a oumentá pa kuminsá ku un empresa. Pa mas informashon i/òf interes tokante kuminsamentu di un empresa bo por tuma kontakto ku Kámara di Komèrsio, departamento di BIS na number di telefòn +599 717 – 5595.