E di dos Bonaire Chamber Art Exhibition a hala sentenares di bishitante

Den su di dos edishon di Bonaire Chamber Art Exhibition riba djasabra 26 di novèmber Kámara di Komèrsio i Industria Boneiru a hala un kantidat abrumador di bishitante. Sentenares di interesado a kumpra un diversidat grandi di obra di arte serka e 36 artistanan presente, for di kuadro, prenda, artíkulo di glas i ‘Beach Art’ te tekstonan motivashonal.

Despues di e apertura ofisial dia 25 di novèmber 2022, Qredits – komo un di nos partnernan pa e evento akí – a organisá un tayer pa e artistanan. E aña akí e tema tabata ‘di hòbiista pa empresario’. Durante e tayer un empresario lokal – Cassy Roosje di Cassy Roosje Creates E.Z. – a kompartí su eksperensia i motivashon tokante su transishon di un hòbiista pa un empresario. Aparte di esaki Qredits a duna informashon tokante e Fiansa Kultural BES (BES-Cultuurlening) i e preparashon pa entregá un petishon. Esaki tabata un bunita oportunidat pa risibí tur informashon ku bo tin mester komo artista pa konbertí bo hòbi den bo trabou.

Entretantu bishitantenan i artistanan, ku a debolbé únikamente reakshonnan super positivo na e organisashon, a brasa Bonaire Chamber Art Exhibition kompletamente. Kámara di Komèrsio Boneiru ke gradisí tur bishitante pa nan sosten na nos artistanan lokal. Naturalmente nos gradisimentu ta bai tambe na e artistanan ku a partisipá!

Kámara di Komèrsio lo sigui hasi esfuerso pa duna artistanan lokal un podio pa asina nan por haña tambe e rekonosementu ku nan meresé.