Kámara di Komèrsio ta tene debate hopi animá tokante ekonomia boneriano

Kámara di Komèrsio a tene un debate di elekshon sumamente eksitoso i hopi animá den hotèl Marriott dia 6 di mart último. 40 empresario tabata presente ku a haña informashon tokante 6 diferente tema tokante e puntonan di bista di sinku di e seis partidonan polítiko na Boneiru. Banda di esei na su punto kulminante 225 hende a mira e debate ‘live’ riba facebook, aparte di e transmishon ‘live’ di Dutch Caribbean TV i e transmishon via radio atraves di Live99FM.

E tópikonan ku a bini dilanti tabata relashoná ku Kámara di Komèrsio, gastu di empresariado, Boneiru komo Blue Destination, Entidat Públiko Boneiru, un haf di karga nobo i disponibilidat di forsa laboral na Boneiru. Prinsipalmente riba e puntonan di Blue Destination, mínimo di eksistensia i disponibilidat di trabou apropiá pa hendenan na Boneiru e partisipantenan a hiba un diskushon fuerte.

Dia 15 di mart tin elekshon di Konseho Insular. Kámara di Komèrsio ta haña ku ta importante pa informá empresarionan bon tokante e puntonan di bista di e partidonan, di manera ku nan por hasi un mihó eskoho pa un partido polítiko. E manera ku Konseho Insular ta formá ta di gran importansia pa e direkshon ku ta skohe pa Boneiru den e kuater añanan binidero.

E Sentro pa Empresariado na Kámara di Komèrsio a hasi e debate posibel. E sentro akí, ku ministerio di Asuntunan Ekonómiko i Klima ta finansiá, mester sòru pa mehorashon di e kondishonnan pa hasi negoshi na Boneiru i pa fortifikashon di e ret mutuo di empresario. E debate di elekshon tabata e promé aktividat den kuadro di e sentro akí. Dentro di poko ta sigui mas informashon den un forma mas amplio tokante e sentro akí na Kámara di Komèrsio.

Pa medio di esaki Kámara di Komèrsio ta gradisí e sinku partidonan polítiko ku a partisipá na e debate i tambe tur empresario ku a sigui esaki ku hopi atenshon i ku tambe a hasi vários pregunta interesante.