KvK Academy 2024 a finalisá eksitosamente ku e espektakular Shark Tank (Tanki di Tribon)

E aña akí KvK Academy a logra un punto kulminante impreshonante ku e organisashon eksitoso di Shark Tank (Tanki di Tribon), inspirá pa e popular programa di televishon. Di e 39 partisipantenan na KvK Academy, no ménos ku 18 empresario a presentá nan empresa inovativo dilanti un hurado ku sinku miembro.

E hurado, konsistiendo di Daniel Gerharts (MCB Bonaire), Andrew Tweeboom (Nynedroid Autorijschool), Ruthsaily Alment (Telbo NV.), Hellen Villaroel (Cactus Accounting Services) i Ottmar Martis (OGS) na un manera profeshonal a husga e ‘pitch’-nan entusiasmá di e empresarionan!

E ganadó grandi di e Shark Tank tabata Siagnee Evertsz di Total Safety First, ku a konbensé e hurado ku su aserkamentu inovativo i ku enfoke riba futuro. E di dos lugá a bai pa Vaughn Astwood di Vinnova, kende ku un otro perspektiva ta bai aserká hóbennan di Boneiru. Miéntras ku Marylou Felida di Kunuku Mágiko Bonaire a sali na di tres lugá ku su idea pa realisá un Kunuku Park inovativo ku su fasilidatnan.

Danki na nos spònsernan nos a entregá premionan fantástiko na e ganadónan. Gustosamente Kámara di Komèrsio ke ekspresá su sinsero gratitut na MCB Bank, Cactus Accounting Services, Ministerio di Asuntunan Ekonómiko i Klima (EZK), Telbo NV, Sentro di Salú Bon Bida, City Shop, Rocargo, Nynedroid Autorijschool i OGS NV pa nan bunita kontribushon.

KvK Academy ta ofresé un plataforma pa empresarionan pa desaroyá nan konosementu i abilidatnan i pa deskubrí oportunidatnan komersial nobo. Pa otro aña tin un KvK Academy planiá atrobe.

Pa mas informashon bo por tuma kontakto via e number di telefòn 717 5595 òf manda un email na bis@kvkbonaire.com.