Eksitoso evento ‘WAW’ di Sentro pa Empresariado pa empresarionan ku ta kuminsando

Riba djabièrnè 22 di novèmber Sentro pa Empresariado, ku ta un parti di Kámara di Komèrsio i Industria Boneiru, a organisá un tayer inspirativo bou di e nòmber ‘Unshakeably Confident – Konfiansa ku no ta tambaliá’. Na e tayer akí a partisipá 38 empresario ku ta kuminsando i ku ta haña guia i sosten via e programa di Sentro pa Empresariado. E tayer tabata na enkargo di Mingli Chung di Ki Connect (Aruba) i Roosje van der Hoek di LOF BV (Boneiru).

Meta di e seshon tabata pa duna sosten na empresarionan ku ta kuminsando, den nan kresementu personal i profeshonal. Sentral tabata preguntanan manera: Ken bo ta komo empresario? Kon sigur bo ta di bo mes? I kon bo ta anda ku miedu pa hasi negoshi? Durante e tayer e partisipantenan a traha ku nan ‘Growth Book – Buki di Kresementu’ personal pa haña mas komprendementu di nan abilidatnan empresarial i pa oumentá nan konfiansa propio.

E dia a terminá ku un seshon yamá ‘uni forsa’, kaminda e partisipantenan a haña oportunidat pa hasi pregunta i risibí konseho balioso for di shete empresario eksitoso di Boneiru. No tin un ret di empresario realmente strukturá na Boneiru. Pa e motibu akí Sentro pa Empresariado lo krea ku ret, kaminda empresarionan ku ta kuminsando i empresarionan eksitoso por topa ku otro i yuda otro progresá pa medio di enkuentronan i eventonan.

E intenshon ta pa krea un aserkamentu strukturá di esaki, kaminda e empresarionan eksitoso por asumí tambe un ròl di mèntòr. Gustosamente Kámara di Komèrsio Boneiru ke ekspresá su gratitut na e empresarionan ku a kompartí nan konosementu i ekspertisio: Sapphira Coffie, Gaby Felix, Jonathan Croes, Huub Groot, Alvin Obersi, Moudy Dabboussi i Ab Dral. Nan kontribushon a hasi e dia inspirativo i balioso akí kompleto.

For di Ministerio di Asuntunan Ekonómiko i Servisio di Reino pa Hulanda Empresarial (Rijksdienst voor Ondernemend Nederland – RVO), Kámara di Komèrsio Boneiru a haña e enkargo pa desaroyá un programa di empresariado ku ta sostené empresarionan ku ta kuminsando ku desaroyo di nan empresa pa di e manera ei realisá un empresa viabel. Ku e evento akí Sentro pa Empresariado ta sigui hasi esfuerso pa duna sosten na empresarionan ku ta kuminsando, na kaminda pa un futuro eksitoso komo empresario.