Kámara di Komèrsio ta organisá enkuentro pa sektor di konstrukshon tokante retraso den pèrmit di konstrukshon
Resientemente Kámara di Komèrsio Boneiru a organisá un enkuentro pa kontratistanan i desaroyadónan di proyekto tokante e señalnan preokupante ku Kámara di Komèrsio a risibí for di e sektor akí relashoná ku e retrasonan den e proseso di dunamentu di pèrmit i e konsekuensianan di esaki. E sektor di konstrukshon ta hopi preokupá tokante e situashon aktual.
Segun legislashon di BES (Dekreto di Konstrukshon BES) e desishon pa un pèrmit mester tuma lugá dentro di diesseis (16) siman. Lamentablemente den práktika ta resultá ku esaki ta dura te asta dos pa tres biaha mas tantu, ku tur e konsekuensianan ku esaki ta trese kuné.
E retrasonan no solamente tin konsekuensia direkto pa e operashon empresarial, pero nan tin tambe implikashonnan ekonómiko i sosial amplio komo resultado, manera riesgonan finansiero konsiderabel pa tantu e kontratistanan i nan empleadonan, komo pa nan dunadónan di enkargo.
Esaki ta kondusí na e siguiente puntonan:
- E kontratistanan ta keda konfrontá ku but pa entrega ku retraso.
- Empleo den e sektor ta bou di menasa, pa motibu ku hopi kontrato laboral no ta keda prolongá, debí na insiguridat pa loke ta trata fecha di inisio di e proyektonan.
- Gastunan ku ta oumentando pa labor, material i transporte.
- Klientenan ku posibelmente mester hasi petishon di nobo pa finansiamentu pa un suma mas haltu.
Riba término medio e sektor ta verwagt ku, si e retrasonan akí kontinuá, esaki por kondusí na un posibel reseshon den sektor di konstrukshon, loke lo tin konsekuensianan negativo pa tantu nos merkado di bibienda, komo pa nos ekonomia lokal. Aparte di loke tin menshoná akí riba, e sektor ta teme ku e retraso ku ta dura asina largu pa loke ta trata e ‘Structuurvisie’, tambe por tin komo konsekuensia ku nos ekonomia ta kai den un reseshon. Un reseshon asina lo por kondusí na intrankilidat sosial, mas tantu desempleo i un oumento di kriminalidat, ku un peso mas grandi pa gobièrnu i nos komunidat komo konsekuensia.
Kámara di Komèrsio ta hasi un yamada riba tur partido – for di kontratistanan i desaroyadónan di proyekto te trahadónan di maneho – pa konhuntamente buska solushon pa e situashon ku nos ta trese dilanti akí. Kámara di Komèrsio ta ofresé su mes pa partisipá komo fasilitadó na un enkuentro asina. Solamente pa medio di mihó kolaborashon i prosesonan mas efisiente, e sektor por keda stabilisá i e konsekuensianan negativo pa nos ekonomia i nos komunidat por keda limitá.
Al final Kámara di Komèrsio ta enkurashá e kontratistanan i desaroyadónan di proyekto pa forma un union, di manera ku por atendé mas efektivamente ku nan interesnan i ku nan por sali padilanti komo un solo bos.
