E programa Sentro pa Empresariado di Kámara di Komèrsio Boneiru a organisá eksitoso enkuentro ‘One-Stop-Shop’ pa empresarionan (aspirante)
E Sentro pa Empresariado, un programa di Kámara di Komèrsio i Industria Boneiru, eksitosamente a organisá e evento ‘One-Stop-Shop’. E evento akí tabata spesialmente intenshoná pa empresarionan ku ta kuminsando i empresarionan aspirante ku tin nesesidat di informashon i guia práktiko na momentu di lanta i desaroyá nan empresa.
Durante e evento tabatin vários stakeholder importante presente pa direktamente sostené i informá empresarionan. Entre otro Servisio di Impuesto Hulanda Karibense (Belastingdienst), Servisio di Imigrashon i Naturalisashon (IND), Asuntunan Sosial i Empleo (SZW), Qredits i Entidat Públiko Boneiru (EPB) – departamento di pèrmit di establesimentu – a duna un aporte balioso.
Hopi hende a bishitá e enkuentro ku a brinda empresarionan oportunidat pa na un solo sitio haña kontesta riba tur sorto di pregunta, ku tópikonan ku tabata varia di finansiamentu i regla, te pèrmit i asuntunan laboral. E presentenan aktivamente a hasi uso di e posibilidat akí i nan a bai kas ku hopi konosementu klarito i hèrmèntnan práktiko.
Ku satisfakshon e organisashon ta wak bèk riba e evento. E asistensia i reakshonnan positivo di e partisipantenan ta enfatisá e nesesidat pa e tipo di enkuentronan aksesibel i informativo akí. E empresarionan a indiká ku awor nan ta sinti nan mes mihó prepará pa pone nan siguiente pasonan.
Kámara di Komèrsio Boneiru a haña enkargo di Ministerio di Asuntunan Ekonómiko i Servisio di Reino pa Hulanda Empresarial pa desaroyá un programa di empresariado ku ta duna sosten na empresarionan ku ta kuminsando na momentu di desaroyá nan empresa pa di e manera akí realisá un empresa faktibel.
Ku e inisiativa akí e programa di Sentro pa Empresariado di Kámara di Komèrsio Boneiru ta konfirmá su ròl di partner ku ta konektá i sostené pa empresariado lokal. Pa informashon bo por yama 717 5595 òf djis kana drenta serka nos na Kaya Amsterdam 23. Bo por manda un email tambe: ondernemerschap@kvkbonaire.com
