Ganadó di KvK Academy ta buta su promé paso komo empresaria ku apertura eksitoso di ‘Flavorful Moments’

Kralendijk, Boneiru – 12 di yuni 2026 – Kámara di Komersio Boneiru (KdK) ku orguyo ta  felisitá Jurdine Felix, ganadó di e edishon mas resien di KvK Academy, ku e eksitoso apertura di su empresa Flavorful Moments. E lansamentu festivo a tuma lugá riba 6 di yüni durante e Foodtruck Festival bon bishitá na Isidel Beach Park.

Bishitantenan tabata para na rei largu pa por a sera konosí ku e kreashonnan sabroso di Flavorful Moments. Jurdine a logra di duna hende adulto i hóben un sorpresa ku su barkianan (‘wafels’) i minidonutnan fresku, ku por a hasi pedida komponé segun propio smak ku diferente sorto di adorno, bou di nan sous di chukulati i karamèl, marshmallow i M&M. E reakshonnan yen di entusiasmo di parti di públiko i e atenshon enorme a duna e apertura un toke di gran éksito.

E direktor di Kámara di Komersio Boneiru, Phar Martha, tambe tabata presente na e festival i a hasi uso di e oportunidat pa personalmente felisitá Jurdine ku e logro importante akí. Na nòmber di KdK, el a ekspresá su apresio pa Jurdine su aktitut empresarial, perseveransia i e forma ku el a logra di tradusí e konosementu i abilidatnan ku Kvk Academy a duna den un empresa eksitoso.

KdK ta espesialmente orguyoso pa mira ku e partisipantenan manera Jurdine ta pone e paso for di ambishon pa yega na un berdadero empresa. Su paso eksitoso ta demostrá ki impakto konosementu, guia i perseveransia por tin riba desaroyo di empresarionan lokal na Boneiru.

KvK Academy 2026 ta start fin di ougùstùs
Ku e éksito di empresarionan manera Jurdine Felix, Kámara di Komersio Boneiru ta mira dilanti yen di konfiansa pa e siguiente edishon di KvK Academy. Fin di ougùstùs 2026 e programa ta start di nobo i ta ofresé empresarionan i profeshonalnan inisial e oportunidat pa sigui desaroyá nan konosementu, abilidatnan i ret di kontakto mas tantu.

KvK ta invitá tur hende ku tin ambishon pa bira empresario pa partisipá na e oportunidat di eksperensia di siñamentu úniko akí pa di tal manera tuma e siguiente paso pa realisá un empresa eksitoso. Lo saka denter di korto mas informashon tokante inskripshon i partisipashon na e medionan di komunikashon di Kámara di Komersio Boneiru.