Kresementu stratégiko pa medio di fushon i atkisishon tabata sentral durante e seshon di informashon bon bishitá ‘Create Growth Through Mergers & Acquisitions’ – Empresarionan a optené konosementu balioso.

Riba djárason 15 di yüli 2026 Kámara di Komèrsio i Industria Boneiru (KdK), den kolaborashon ku Executive Strategy Consultancy, a organisá un seshon di informashon práktiko ku komo tema “Create Growth Through Mergers & Acquisitions – Krea Kresementu pa medio di Fushon i Atkisishon”. E seshon ku tabata na enkargo di Evert Bleijenberg MBA, tabata kompletamente dirigí riba benta di empresa, atkisishon (tumamentu over) di empresa, i kresementu duradero.

E seshon di informashon a enfoká riba e nesesidat kresiente di empresarionan pa prepará nan mes bon pa futuro di nan empresa. Kada biaha mas i mas empresa ta hasi nan mes pregunta manera: Ki ora ta e momentu korekto pa bende mi empresa? Kon mi ta determiná balor di mi empresa? Un fushon òf partisipashon por kontribuí na kresementu mas aleu?

Durante e seshon di informashon a ofresé instrumentonan práktiko, konosementu stratégiko i diferente hèrmènt na e partisipantenan pa asina nan haña mihó konosementu pa loke ta trata posibilidat di benta i balor di nan empresa, pero tambe pa loke ta trata e oportunidatnan i e puntonan di atenshon na momentu di kompra di un empresa. Pa medio di vários ehèmpel for di pràktika i eksperensianan for di merkado, a kondusí e partisipantenan den e proseso kompleto di Mergers & Acquisitions (M&A): for di rekonosé oportunidat i evaluá kandidatonan pa tuma over, te na un integrashon eksitoso despues di a tuma over.

Durante e seshon di informashon entre otro e siguiente tópikonan a bini na vigor:

• Ki ora un fushon òf un atkisishon (tumamentu over) ta e strategia korekto di kresementu
• E faktornan mas importante pa kresementu promé, durante i despues di un atkisishon
• Ehèmpelnan for di práktika i ‘lessons learned’ for di merkado
• Identifikashon i evaluashon di kandidatonan adekuá pa atkisishon
• Kon pa krea mas balor empresarial i kresementu duradero
• Instrumentonan práktiko pa haña konosementu di balor, posibilidat di benta i potensial di kresementu di un empresa

E partisipantenan a reakshoná hopi entusiasmá riba kontenido di e seshon. Nan a indiká ku e seshon di informashon tabata sumamente balioso i ku nan a bai kas ku konosementu ku ta direktamente aplikabel, hèrmèntnan práktiko i konosementu nobo ku nan por usa na momentu di tuma desishon stratégiko tokante futuro di nan empresa.

Ku e enkuentro akí un biaha mas Kámara di Komèrsio Boneiru ta suprayá importansia di kompartimentu di konosementu i fortifikashon di empresariado na Boneiru. Pa medio di proveé empresarionan ku konosementu aktual i intrumentonan práktiko, Kámara di Komèrsio ke kontribuí na desaroyo empresarial duradero i un ekonomia lokal fuerte.

Kámara di Komèrsio ta ekspresá su gratitut na e orador di Executive Strategy Consultancy, señor Evert Bleijenberg, pa su ekspertisio, su entusiasmo i su kapasidat pa transmití problemanan kompleho na un manera aksesibel.

Bo ke keda na altura di e tayernan, e kursonan òf e proyektonan ku Kámara di Komèrsio Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio via 717 5595 òf manda un email na bis@kvkbonaire.com