Eksitoso seshon di The Next Step tokante maneho finansiero

Ku un asistensia di mas òf ménos 30 empresario, Kámara di Komèrsio Boneiru ta wak bèk riba un seshon eksitoso di The Next Step: Creating Value Through Financial Management (e siguiente paso: krea balor pa medio di maneho finansiero). Bou di guia di e estratega Evert Bleijenberg e empresarionan presente na un manera práktiko i aksesibel a haña mas konosementu di maneho finansiero i importansia di esaki pa un empresa salú i sostenibel, i ku ta produsí ganashi.

Práktika tabata sentral durante e seshon. A enbolbí e empresarionan aktivamente ku e presentashon, nan a kompartí nan eksperensianan i a hasi pregunta tokante nan propio empresa. Tópikonan manera struktura di preis di kosto, determinashon di preis di benta, márgen i produkshon di ganashi a sòru pa un berdadero ‘wake-up call’ serka diferente partisipante. E seshon a hasi bon kla kon importante ta pa no solamente wak kiko bo ta bende, pero prinsipalmente kiko finalmente ta e ganashi ku bo produkto òf servisio ta produsí.

E partisipantenan a apresiá partikularmente e forma den kua Evert Bleijenberg a sa di splika tópikonan finansiero na un manera komprendibel i aksesibel. E empresarionan a indiká ku su manera di splika a yuda nan komprendé e materia mas mihó i kon pa hasi uso di esaki den nan propio empresa.

Esaki a bini bèk tambe den e parti final di e enkuentro. Durante un ehersisio práktiko e empresarionan por a tuma nan propio produkto òf servisio pa kalkulá nan preis di benta. Di e manera akí nan por a apliká e konosementu optené mesora den nan propio empresa i nan a haña mas bista den e pregunta si nan preis aktual realmente ta kontribuí na un resultado salú.

Phar Martha, direktor di Kámara di Komèrsio Boneiru, a pone énfasis riba e importansia pa un empresario tin bista den su kalkulashon di preis di kosto. Ta remarkabel ku hopi empresario debí na falta di esaki, den e tempu aktual ku diferente fluktuashon di preis riba merkado, ta reakshoná lat òf no ta hasi e adaptashonnan korekto den nan preisnan, loke tin konsekuensia grandi pa nan operashon empresarial. Dominio di bo preis di kosto, bista den bo ‘break even’ i elastisidat di bo preis di benta ta faktornan importante di éksito pa un empresario. Pa hopi hende e temanan akí ta parse tópikonan difísil, pero e tayer akí a splika nan na un manera hopi aksesibel pa tur hende.

Finalmente e konsehero empresarial Jían Magdalena a hasi un yamada riba e empresarionan presente pa no solamente bai ku inspirashon for di seshon, pero tambe pa debidamente pone e siguiente paso. El a enkurashá e empresarionan ku na un manera dirigí ke traha riba nan empresa i riba nan metanan pa kresementu, pa inskribí pa e trayekto di The Next Step. Den e trayekto akí empresarionan ta haña sosten pa tradusí nan ambishonnan den pasonan konkreto i di e manera ei realisá nan metanan pa kresementu.

Tokante ‘The Next Step’

The Next Step ta un programa di desaroyo di Kámara di Komèrsio Boneiru den kolaborashon ku RvO (Servisio di Reino pa Hulanda Empresarial), ku ta duna sosten na empresarionan eksistente pa loke ta trata e siguiente fase di kresementu di nan empresa. Pa medio di kapasitashon, tayer, enkuentro di konosementu i guia, e partisipantenan ta haña hèrmèntnan práktiko pa profeshonalisá nan empresa mas aleu i laga esaki krese na un manera sostenibel.

Empresarionan ku ta interesá den partisipashon na e programa òf ku ta deseá di risibí mas informashon, por tuma kontakto via bis@kvkbonaire.com òf pasa un ratu na Kámara di Komèrsio Boneiru na Kaya Amsterdam 23.