Fiansa pa spar koriente pa Empresa Mediano i Chikí ta disponibel pa empresarionan na Boneiru, Sint Eustatius i Saba.

Empresarionan na Boneiru por hasi uso di e Fiansa pa spar koriente pa Empresa Mediano i Chikí di Servisio di Reino pa Hulanda Empresarial (Rijksdienst voor Ondernemend Nederland – RVO). Ku e areglo akí empresanan chikitu i mediano por invertí den medidanan pa spar koriente, manera isolashon, iluminashon ku ta ekonómiko den uso di koriente i otro solushonnan sostenibel. E fiansa ta brinda empresarionan un posibilidat pa redusí nan gastunan di koriente strukturalmente, pa sostenibilisá nan maneho i pa bira ménos dependiente di e preisnan di koriente ku ta oumentando.

Pa kada lokalidat empresarial, empresarionan por fia entre € 10.000 i € 250.000, sin pant.

Pa bini na remarke, e siguiente kondishonnan ta na vigor:

• E empresa ta usa minimalmente 10.000 kWh di koriente pa aña
• E invershon mester aparesé riba e lista ofisial di medida di RVO
• E empresario mester entregá dos kuenta anual resien
• Dentro di 18 luna despues di aprobashon di e fiansa mester kuminsá ku e medidanan pa spar koriente

E fiansa tin un interes fiho di 6,9% pa aña i mester paga esaki bèk dentro di maksimalmente shete aña. Por entregá petishon te ku dia 10 di desèmber 2026. Otro aña meimei di luna di mart e ta habri pa aña 2027.

Nos ta enkurashá empresarionan na islanan BES pa kontrolá na tempu si nan ta bini na remarke, i pa hasi uso di e posibilidat di finansiamentu akí. Mas informashon, e kondishonnan i e formulario pa hasi petishon ta optenibel pa medio di e wèpsait ofisial di Servisio di Reino pa Hulanda Empresarial (RVO): www.rvo.nl/subsidies-financiering/mkb-energiebesparingslening

Wak e webinar: https://www.youtube.com/watch?v=GotHzP9MZrg

Bo por tuma kontakto ku Kámara di Komèrsio via 717 – 5595 òf bo por manda un email na bis@kvkbonaire.com