BOG i KvK ku akshon úniko pa empresarionan lokal

Kralendijk – Bonaire Overheidsgebouwen NV (BOG) i Kámara di Komèrsio i Industria (KvK) ta duna empresarionan boneriano oportunidat pa via un akshon úniko bini na remarke pa e eksplotashon di un di e tres kioskonan den e parke di rekreashon ku nan ta konstruyendo entre Chogogo Beach Resort i Den Laman Condominiums. Dia 9 di yanüari 2024 e dos organisashonnan akí a firma un akuerdo di kolaborashon.

Meta di e kolaborashon akí ta pa stimulá empresariado, duna ekonomia di Boneiru un impulso i duna empresarionan nobo i eksistente espasio i ekipahe pa kontinuá ku nan desaroyo. Interesadonan por yena un formulario den forma digital via e wèpsait di Kámara di Komèrsio, òf nan por hasi uso di e QR-code akí bou. Banda di esaki mester upload presentashon i motivashon di e plan di negoshi huntu ku un CV via e formulario. Pa mas informashon i asistensia ku yenamentu di e formulario por manda un email na Sentro pa Empresariado via ondernemerschap@kvkbonaire.com òf yama +5997175595. Partisipashon na e akshon ta posibel te 31 di yanüari 2024.

For di tur e formularionan ku a drenta, un tim konsistiendo di profeshonalnan di e sektor i stakeholdernan ta skohe 5 partisipante ku ta bai partisipá na e gran final: un evento den estilo di un ‘Shark Tank – Tanki di Tribon’, kaminda lo anunsiá e tres ganadónan final. Pa kada kiosko tin un kapital inisial di 5000 dòler disponibel komo impulso di BOG. Pa salbaguardiá e chèns pa logra i éksito di e empresarionan akí i pa oumentá nan konosementu di empresariado, guia i partisipashon na KvK Academy lo ta na enkargo di Kámara di Komèrsio Boneiru via e Sentro pa Empresariado.

Traha brùg huntu

“Laga nos stimulá i sigui promové kolaborashon entre organisashonan y empresanan i huntu traha brùg pa Boneiru”, segun Phar Martha, direktor di Kámara di Komèrsio. Direktor di BOG Adely Susana-Jansen ku alegria a bisa: “Nos ta sumamente kontentu ku hasiendo uso di e akshon akí nos por duna un aporte na ekonomia di nos isla i ku di e manera akí nos por duna un impulso na nos empresarionan lokal. Ku orguyo nos por bisa ku e parke a bira posibel pa nos mes hendenan i atraves di nos mes hendenan.”   

 Lenk pa bai na e formulario: https://bonaire.qualtrics.com/jfe/form/SV_8Bw7CL0QQQUVA6q

 QR-code pa download e formulario: