Nov 08
Eventonan

Un bista bèk riba FRED expo 2022

Kámara di Komèrsio Boneiru i BONHATA a representá Boneiru na nòmber di sektor privá na e Flinx Recruitment Expo Dutch Caribbean (FRED expo) dia 29 di òktober último na Rotterdam. Meta di e bolsa akí tabata pa drenta den kontakto ku kandidatonan ku ta interesá pa bin traha na Boneiru. Kámara di Komèrsio Boneiru i BONHATA a mira un nesesidat den sektor privá pa yena sierto funshonnan i pa e motibu akí konhuntamente a disidí pa ta presente na e bolsa akí pa – banda di sektor di gobièrnu – representá sektor privá tambe komo opshon interesante pa kandidatonan. Ámbos organisashon a presentá vários vakatura konkreto di diferente empresa lokal na e bolsa. A pone e vakaturanan akí riba e wèpsait di FRED expo www.fredexpo.com tambe.

BONHATA a duna alabes un presentashon na e bolsa tokante trahamentu den sektor di hospitalidat na Boneiru i a ripará ku tin hopi interes di e partisipantenan pa funshonnan den ‘management’ den sektor turístiko.

Kámara di Komèrsio Boneiru a duna un presentashon tokante e posibilidatnan ku empresariado na Boneiru tin pa ofresé.

Tur dos organisashon tabatin hopi interes di e bishitantenan na e stènt ku a hala hopi atenshon, esta e stènt ‘It’s in our nature’.

Kámara di Komèrsio a establesé hopi kontakto tambe ku empresarionan prosedente di nos islanan i ku ta aktivo na Hulanda i a motivá nan tambe pa hasi uso di nan konosementu i eksperensia pa desaroyo mas aleu di Boneiru pa medio di ehekutá nan aktividatnan komersial akí tambe.

Kámara di Komèrsio i BONHATA ta wak bèk riba un partisipashon eksitoso na e bolsa akí, mirando ku sigur a lanta interes di e bishitantenan pa konsiderá Boneiru komo opshon.

Bo ke sa mas i bo tin pregunta tokante bishita di Kámara di Komèrsio Boneiru òf e FRED expo, e ora ei bo por manda un email na: bis@kvkbonaire.com.