Kámara di Komèrsio a haña un enkargo di Ministerio di Asuntunan Ekonómiko i Serviso di Reino pa Hulanda Empresarial (Rijksdienst voor Ondernemend Nederland – RVO) pa desaroyá un programa di empresariado ku ta duna sosten ku desaroyo di nan empresa na empresarionan ku ta kuminsando, pa asina realisá un empresa viabel. E programa akí mester sòru ku serka empresarionan ta mas mihó konosí kua ta e yudansa ku nan tin mester i kua ta e abilidatnan ku nan tin ku desaroyá pa disponé di un empresa viabel. E ora ei por ofresé yudansa grátis riba tereno di finansiamentu, konosementu, pèrmit, supsidio i impuesto. Nan por sigui desaroyá e abilidatnan akí mas aleu pa medio di hasi uso di ‘voucher’ pa treinen, kurso i ‘coaching’.

Un di e desafionan mas grandi ku empresarionan ta konstatá, ta e falta aktual di un ekosistema koherente pa empresariado na Boneiru ku ta proveé den nesesidat di tur e aspektonan di un empresa nobo. E Sentro pa Empresariado ta bai sòru ku ta bini mas atenshon pa e aspektonan mas importante di esaki durante komienso di e empresa. Pa e motibu akí un kantidat grandi di organisashon a primintí di bai traha huntu riba un mihó dunamentu di guia na empresarionan. Esakinan ta entre otro Servisio di Reino pa Hulanda Empresarial, Servisio di Impuesto Hulanda Karibense, Servisio di Imigrashon i Naturalisashon, Entidat Públiko Boneiru, Qredits, e notarionan i e Ofisina di Benelux pa Propiedat Intelektual (Benelux Office for Intellectual Property).

No tin un ret realmente strukturá di empresario na Boneiru. Pa e motibu akí e sentro lo krea un ret, kaminda empresarionan ku ta kuminsando i empresarionan eksitoso por topa otro i yuda otro pa medio di enkuentro i evento. E intenshon ta pa hasi di esaki un aserkamentu strukturá, kaminda empresarionan eksitoso por asumí un ròl di mèntòr tambe. Mas aleu empresariado lo keda promové pa medio di pone empresarionan eksitoso den spòtlait. Premio i apresio pa empresariado ta un bunita manera pa hasi esaki konosí serka un públiko mas amplio.

Bo ke mas informashon tokante pasonan spesífiko òf bo tin pregunta tokante bo empresa konkreto? Tuma kontakto ku empleadonan di BIS, alkansabel via ondernemerschap@kvkbonaire.com.

Konseho i informashon

  • Kiko ta e diferensia entre praktiká un hòbi i un empresa?

    Por ta ku de bes en kuando bo ta hasi algu ku bo ta gana sèn kuné; drecha outo pa bo besiña, drecha port’i kurá òf yuda fèrf un kas. Den e kasonan ei no ta klarito si ta trata di un empresario. E suseso ta insidental i ounke tin un kompensashon p’e, e ta keda un aktuashon komo hòbi. E ta bira otro si bo bai drecha diferente outo, traha un kantidat di port’i kurá i fèrf diferente kas pa siman. E ora ei pokopoko pero sigur bo ta bai den direkshon di ta un empresario i bo tin ku inskribí bo mes komo empresa den registro komersial.

    Entre hasi algu komo hòbi i hasi negoshi tin un área grandi ku no ta masha kla. Laga nan informá bo na KvK  pa bo sa presis si bo ta empresario òf nò.   

  • Mi ta bai kuminsá un negoshi; mi ta obligá pa skirbi un plan di negoshi?

    Na promé lugá nos ta haña fantástiko ku bo ta bai hasi negoshi! Pa loke ta trata un plan di negoshi obligatorio e opinionnan ta varia. Tin hopi komersiante ku ta eksitoso ku nan empresa sin un plan di negoshi. Pero en general ta hopi konsehabel pa skirbi un bon plan di negoshi. Ku esaki bo ta sòru ku bo ta pensa bon tokante tur faseta di hasi negoshi, entre otro un bon investigashon di merkado i si e plan ta finansieramente realisabel. Tin sufisiente empresario ku a kuminsá muchu lihé i ku na kaminda a ripará ku nan a lubidá riba sierto aspektonan. Mirando ku 75% di tur negoshi rònt mundu dentro di 5 aña mester sera nan portanan ta konsehabel pa engrandesé bo oportunidatnan i pensa bon tokante e elementonan sumamente importante aki di bo futuro negoshi. KvK su konseho ta: si, semper skirbi un plan di negoshi!

    Si bo ke hasi un fiansa serka por ehèmpel un banko òf un instansia manera Qredits (finansiamentu mikro), e ora ei ta asta un obligashon pa skirbi un bon plan di negoshi. Sin e plan aki bo no ta haña fiansa.

  • Na unda mi por haña mas informashon tokante habrimentu di un negoshi?

    Riba internèt bo ta haña hopi informashon tokante tur faseta di hasi negoshi. Nan a skirbi masha hopi buki mes tokante kon bo ta bira un empresario eksitoso, ku tur posibel táktika aden. Pero bo no tin mester di buska asina leu fo’i kas, riba nos isla mes bo por haña sufisiente ehèmpel di empresarionan ku a anda eksitosamente ku e sirkumstansianan. Papia ku nan tokante esaki pa informá bo mes. Hopi biaha solushon ta mas serka bo òf mas simpel ku bo ta pensa.

    Pasa un ratu na KvK pa mas konseho òf informashon. Mientras bo ta gosa di un dushi kòfi gustosamente nos ta yuda bo den bo búskeda pa kontesta riba bo preguntanan!

  • Mi mester ta inskribí na Boneiru pa por habri un empresa na Boneiru?

    Nò, esei no nesesariamente mester ta e kaso. Si bo ta kuminsá ku un persona hurídiko (por ehèmpel BV òf NV) bo no mester ta residensiá na Boneiru. Pero si al kontrario bo skohe pa Negoshi Propio (EZ), e ora ei si bo mester ta inskribí na Boneiru. Pa mas informashon tokante e diferente formanan hurídiko, klek AKI (lenk pa Forma Hurídiko), tokante personanan hurídiko, klek AKI (lenk pa Persona Hurídiko) òf bo por pasa un ratu na KvK pa mas konseho.

No por a hañ’e?

O tuma kontakto ku nos

+599 717 5595

E number di telefòn ta alkansabel durante siman.

Djaluna - Djabierne
08.00 te ku 15:00
Email

Tuma kontako ku email