𝐈𝐧𝐢𝐬𝐢𝐨 𝐝𝐢 𝐊𝐯𝐊 𝐀𝐜𝐚𝐝𝐞𝐦𝐲 𝟐𝟎𝟐𝟒: 𝐅𝐨𝐫𝐭𝐢𝐟𝐢𝐤𝐚𝐬𝐡𝐨𝐧 𝐝𝐢 𝐄𝐦𝐩𝐫𝐞𝐬𝐚𝐫𝐢𝐚𝐝𝐨 𝐧𝐚 𝐁𝐨𝐧𝐞𝐢𝐫𝐮

Djaweps 22 di ougùstùs 2024 – Kámara di Komèrsio i Industria Boneiru (KvK Bonaire) riba djaweps 22 di ougùstùs último ku éksito a duna señal di inisio pa KvK Academy 2024. E aña akí e Akademia ta ranka sali atrobe ku tantu un grupo kaminda e idioma di instrukshon ta papiamentu, komo un grupo kaminda e idioma di instrukshon ta hulandes. E meta di KvK Academy ta pa fortifiká empresariado na Boneiru i ku esaki duna un aporte importante na fortifikashon di nos ekonomia lokal.

Ku e lema “Educating & Empowering Entrepreneurs – Edukando i Empoderando Empresarionan”, KvK Academy ta enfoká riba ofresé konosementu i abilidatnan balioso na empresarionan. Dosentenan wéspet di institutonan lokal lo kapasitá e partisipantenan na e programa pa loke ta trata abilidatnan empresarial esensial.

KvK Academy ta un inisiativa ku Kámara di Komèrsio Boneiru a desaroyá den su totalidat, ku komo meta pa alsa empresariado na nos isla na un nivel mas haltu.