100% di kompensashon pa empresanan unipersonal na mishon komersial internashonal na Miami!
Danki na sosten finansiero di Entidat Públiko Boneiru, awor empresanan unipersonal (eenmanszaak) tambe por bini na remarke pa kompensashon kompletu di e gastunan di partisipashon. Registrá rápidamente!
For di 16 te ku 19 di novèmber 2026 e mishon komersial internashonal i eksposishon di negoshi ‘From Island Roots to Globel Routes’ ta tuma lugá na Miami.
E mishon komersial spesial akí ta trese empresarionan di e islanan karibense huntu ku partnernan di negoshi internashonal i potensial klientenan. Ta trata di un ekselente oportunidat pa establesé kontaktonan komersial, interkambiá konosementu, eksplorá merkadonan nobo i deskubrí oportunidatnan di kresementu pa bo empresa.
Pa kua empresarionan e mishon komersial akí ta interesante?
E mishon komersial ta enfoká riba empresarionan for di e siguiente sektornan:
– Manufacturing – Industria di produkshon
– Agriculture & Food – Agrikultura, produkshon di kuminda i industria di komestibel
– Hospitality – Turismo, hóreka i hospitalidat
– ICT & Technology – Teknologia di informashon i komunikashon i inovashon
– Orange Economy – Industria kreativo, moda, farándula, arte i medionan di komunikashon
– Servisio komersial – Kònsùltent, akountent, konsehero finansiero, profeshonal di merkadeo i otro dunadónan di servisio profeshonal
Bon notisia pa empresanan unipersonal (eenmanszaak): 100% di kompensashon!
Danki na sosten finansiero di Entidat Públiko Boneiru, empresanan unipersonal (eenmanszaak) ku ta kumpli ku e kondishonnan stipulá, por bini na remarke pa kompensashon 100% di e gastunan di partisipashon na balor di USD 1850 (paga tinu, esaki ta sin e gastunan pa pasashi, akomodashon i kuminda).
Esaki ta ofresé empresarionan independiente na Boneiru un bunita oportunidat pa establesé kontaktonan internashonal i desaroyá nan empresa mas aleu.
Paga tinu: E kantidat di lugá supsidiá ta limitá. Tin kondishon mará na e kompensashon.
Kon bo ta registrá?
Bo ke partisipá na e mishon komersial internashonal akí òf bo ke risibí mas informashon tokante e prosedura di registrashon i e sosten finansiero disponibel?
E ora ei tuma kontakto pa mas tardá 6 di novèmber ku Kámara di Komèrsio i Industria Boneiru (KvK Bonaire).
Manda un email na bis@kvkbonaire.com. Gustosamente nos ta informá bo tokante e kondishonnan pa partisipashon, e prosedura di registrashon i e posibilidatnan pa sosten finansiero.
Bo ke registrá mesora? Por hasi esei pa medio di e lenk akí.
Tin sosten finansiero pa BV i NV tambe
Bo tin un BV òf NV i bo a entregá un petishon kaba pa e areglo di Support International Business (SIB) na Rijksdienst voor Ondernemend Nederland (RVO)?
E ora ei posibelmente bo por bini na remarke pa 50% di kompensashon di e gastunan di partisipashon di USD 1850 (paga tinu, esaki ta sin e gastunan pa pasashi, akomodashon i kuminda).
No warda muchu hopi! E kantidat di lugá supsidiá ta limitá. Registrá na tempu i deskubrí oportunidatnan di kresementu internashonal pa bo empresa!