34 partisipante di KVK- academy a haña sertifikado

Riba djaweps 1 di desèmber último tabatin entrega di sertifikado na 34 partisipante di KvK Academy pa aña 2022. Ku e trayekto di KvK Academy, Kámara di Komèrsio ta oumentá e chèns  pa partisipantenan kontinuá eksitosamente ku nan empresa pa medio di añadí mas abilidat  empresarial na kapasidat di e partisipantenan. Di e manera akí Kámara di Komèrsio ke fortifiká Boneiru su ekonomia.

Komo tarea final e aña akí nan a organisá un ‘Shark Tank’ (Tanki di Tribon), kaminda e partisipantenan na un manera kreativo a presentá nan empresa na 5 miembro di hurado. Durante un ‘pitch’ di 5 minüt e partisipantenan a hasi tur loke tabata na nan alkanse pa konvensé e miembronan eksperto di hurado tokante nan idea empresarial i nan konosementu i abilidat. Ganadó di e tarea final akí a resultá señora Dalitza Rijna, kende den un forma sumamente konvinsente a presentá su ‘Pure Desires’ na e hurado.

‘Pure Desires’ ta produsí ‘scrub’ i zeta biológiko úniko i trahá na kas pa kútis, ku ta konsistí di fruta fresku, zeta di koko i suku orgániko. E ganadó a gana e siguiente bunita premionan ku vários spònser a pone disponibel. Entidat Públiko Boneiru a pone un suma di $ 5.000,- disponibel pa invershon den e empresa. TCB a opsekiá partisipashon na un ‘business seminar’ den region pa e ganadó komo premio. City Shop a kontribuí ku un lèptòp moderno pa e ganadó i Rocargo Services a pone un suma di $ 500,- disponibel pa importashon di sierto produktonan. E Servisio di Reino pa Empresariado (Rijksdienst voor Ondernemend Nederland – RVO), un departamento di ministerio di Asuntunan Ekonómiko i Klima a finansiá un trayekto di coaching di 24 ora. Telbo Bonaire a ofresé internèt komersial grátis, Sentro di Salú Bon Bida a ofresé un aña di fitness grátis, miéntras ku Ohana Consultancy e primintí sosten ku skirbimentu di un plan di negoshi.

E di dos premio a bai pa señora Genevieve Saragoza di ‘The Magical Kids activity taxi’, kende a risibí $ 1.000,- di Cactus Accounting Services pa su empresa i tambe yudansa ku skirbimentu di su plan di negoshi. Señor Edson Frans di ‘My Tea Bonaire’ a gana e di tres premio i el a risibí un suma di $ 1.000,- di Maduro & Curiel’s Bank pa mas invershon den su empresa.

Tur premio tin komo meta pa duna un sosten èkstra na e partisipantenan menshoná akí riba pa profeshonalisá nan empresa mas aleu. Kámara di Komèrsio ta gradisí e spònsernan i tambe e entrenadónan (eksterno) pa nan aporte na KvK Academy i ta felisitá e ganadónan i alabes e otro partisipantenan ku e resultado ku nan a logra.

Finalmente Kámara di Komèrsio ta deseá tur partisipante hopi éksito ku nan empresa. Na aña 2018 Ministerio di Asuntunan Ekonómiko i Klima a supsidiá desaroyo di e kuríkulo di KvK Academy. Ta intenshon di Kámara di Komèrsio pa durante aña 2023 tambe ofresé e kuríkulo akí. Pa mas informashon manda un email na bis@kvkbonaire.com òf sigui e página di facebook di Bonaire Chamber of Commerce.