Jan 31
Notisia

Apertura di ‘Mahalo – Bowls & Rolls’ na Boneiru

Djárason 29 di yanüari 2025 apertura a tuma lugá di e restorant nobo Mahalo – Bowls & Rolls, propiedat di Tiffany Dorand, ganadó di e edishon 2023 di KvK Academy – Tanki di Tribon. Direktor di Kámara di Komèrsio, sr. Phar Martha, miembronan di famia, konosínan di e propietario i vários otro invitado tabata presente na e apertura. 

Despues di un spich di apertura di parti di Tiffany, kaminda e tabata visibelmente emoshoná, pastor a tene un diskurso kòrtiku i a bendishoná e propietario i su negoshi nobo ku un orashon. 

E kòrtamentu di sinta den un forma seremonial a marka e apertura ofisial di e restorant nobo, situá den sentro di siudat. Despues e wéspetnan a haña un rekorido i splikashon tokante e menú, siguí pa un momentu konhunto di bríndis. Seguidamente e wéspetnan por a hasi nan pedido i gosa di e sabornan i platonan di Mahalo – Bowls & Rolls. 

Kámara di Komèrsio Boneiru ta deseá e ganadó di edishon 2023 di KvK Academy hopi éksito ku su empresa nobo! 

Banda di esaki nos ke gradisí e spònsernan tambe pa nan sosten di tur aña na e trayekto akí. E aña akí tambe Kámara di Komèrsio ta sigui hasi esfuerso pa stimulá empresariado na nos isla. Bo tin gana di sa kon nos por yuda bo? E ora ei sigui nos riba nos medionan sosial òf bishitá nos wèpsait pa mas informashon tokante e próksimo treinennan i programanan.