Dentro di poko Kámara di Komèsio ta introdusí UN SENTRO PA EMPRESARIADO

Riba término kòrtiku Kámara di Komèrsio lo kuminsá ku un ‘Sentro pa empresariado’. E sentro mester sòru pa stimulá empresariado mas tantu ainda serka nos poblashon lokal, mehorá e klima empresarial na Boneiru, drecha e ret di organisashon i logra ku organisashonnan ku ta duna guia na empresario ta bai traha mas mihó huntu. Ta trata akí di un kolaborashon di entre otro Kámara di Komèrsio, Rijksdienst voor Ondernemend Nederland (RVO), Entidat Públiko Boneiru, Qredits i otro partidonan. Pa esaki Kámara di Komèrsio a haña un tarea i finansiamentu di Ministerio di Asuntunan Ekonómiko i Klima.

E sentro menshoná ta ubiká na Kámara di Komèrsio na Kaya Amsterdam 23. Akí durante e kòmbersashon di registrashon di empresarionan lo pone mas énfasis riba e nesesidatnan i e petishon pa ayudo di empresarionan. A base di esaki lo por wak kua tipo di guia i coaching ta nesesario, entre otro pa medio di hasi uso di ‘coaching vouchers’ di Rijksdienst voor Ondernemend Nederland – RVO. Banda di esaki lo yuda empresarionan pa haña nan kaminda den asuntunan di gobièrnu. Esaki ta konta tantu pa riba tereno di pèrmit komo riba tereno di supsidio. Tambe konsientisashon pa loke ta trata formanan di finansiamentu (mas barata) lo ta parti di e sentro menshoná akí riba. Al final lo pone empresariado tambe bou di atenshon di nos poblashon, inkluso hóbennan, i lo hasi mas uso di evento (di ret) pa empresario.

E pandemia di COVID-19 a sòru pa vishonnan otro i nobo na Boneiru. Tin nesesidat di empresariado nobo (entre otro turístiko) ku ta basá riba sostenibilidat, balornan di naturalesa i kultura i tradishonnan lokal, e prinsipionan basiko di e konsepto di Blue Destination. Esaki ta eksigí ekspertisio i sosten nobo pa realisá e transishon akí. Tambe e ekonomia aktual ta pidi pa stimulashon di aktividat empresarial nobo (entre otro diversifikashon) pa mediante esei ofresé un solushon pa problemanan lokal. Un di e desafionan mas importante ta e falta aktual di un ekosistema koherente di empresariado ku ta proveé den nesesidat di tur fase di un empresa.

Awor akí ta duna forma na e ekosistema akí i e kolaborashon entre tur partido menshoná. E promé aktividatnan visibel lo tuma lugá dentro di poko den forma di eventonan (di ret) pa empresarionan. Mas despues den e aña akí lo sigui informashon mas amplio tokante e Sentro pa Empresariado i strukturashon di esaki. Kámara di Komèrsio tin un tarea legal pa stimulá desaroyo ekonómiko pa medio di promoshon di investigashon i di formanan di konsulta i kolaborashon ku ta regardá interesnan ekonómiko. Banda di esaki Kámara di Komèrsio tin komo tarea pa duna informashon di índole general tokante lantamentu i maneho di un empresa. Kámara di Komèrsio ta hopi kontentu ku implementashon di e Sentro pa Empresariado, mirando ku esaki ta kontribuí na su tareanan legal i Kámara di Komèrsio ta gradisí Ministerio di Asuntunan Ekonómiko i Klima pa a otorgá e proyekto akí.