Di ‘koperashon’ pa ‘individual’

Komunikado relashoná ku Dia di Rincon

Organisashonnan di trahadó i dunadónan di trabou a keda sumamente asombrá pa motibu di e komunikado di diputado E. Cecilia tokante Dia di Rincon. Banda di kontenido di e mensahe e partnernan sosial den Diálogo Sentral ta prinsipalmente indigná tokante e echo ku e diputado ta violá un di e palabrashonnan mas esensial di e konsulta aki: no publiká komunikashon for di e diálogo sin konsenso di e otro dos partnernan. Ku e diputado ta skohe pa e kaminda aki ta straño, pero ku den un komunikado inhustamente e ta kulpa e partnernan di e echo ku no a yega na un akuerdo tokante un dia liber, por keda kalifiká komo un falta di rèspèt!

Desde algun aña selebrashon di Dia di Rincon ta riba agènda di Diálogo Sentral. Organisashonnan di dunadónan di trabou a indiká ku nan apsolutamente  no tin problema pa hasi 30 di aprel un dia liber, basta ku kambia esaki ku un otro dia liber ofisial. Asina bo ta haña ku desaroyo ekonómiko i preservashon di kultura di nos isla ta keda perfektamente balansá. Organisashonnan di trahadó ta sostené e punto di bista aki. Es mas, na luna di yüni 2017 USIBO asta a manda un karta pa gobièrnu di Boneiru konteniendo e akuerdo tokante kambio di Dia di Rincon ku e djaluna despues di karnaval grandi. Organisashonnan di dunadónan di trabou tambe a sostené e opshon aki. Tabatin pues un akuerdo kompletamente kla ku gobièrnu por a tuma un desishon formal tokante di dje.  Ministerio di Asuntunan Sosial i Labor na Hulanda na luna di òktober 2017 ainda a manda un karta pa e diputado ku e pregunta kiko e situashon ta regardando e dia liber riba 30 di aprel. Gobièrnu di Boneiru no a kontestá ni e karta di USIBO, ni e karta di ministerio di Asuntunan Sosial i Labor. Gobièrnu di Boneiru no a tuma un desishon formal tampoko.

Na luna di yanüari 2018 e diputado a indiká ku e no ke sigui papia tokante tur sort’i kos, pero ku prinsipalmente e ke bai ‘aktua’. P’esei ta hopi remarkabel ku e mesun diputado aki no ta hasi totalmente nada ku e informashon ku a entregá na dje riba un teblachi. Den su komunikado e diputado ta hasi menshon di un reunion den luna di yanüari 2018, kaminda el a papia ku e partnernan. Banda di e echo ku ta solamente 15 minüt di tempu e diputado a dediká na e konsulta importante aki, e no a papia ni ún palabra tokante Dia di Rincon. Ku despues di esei dentro di Entidat Públiko Boneiru e ta funda un grupo di trabou pa investigá kua ta e posibilidatnan pa e dia kultural-históriko importante aki, ta mas remarkabel ainda: e no a invitá ningun partner for di Diálogo Sentral. Na lugá di esei e Kolegio Ehekutivo aki ta warda te na último momentu pa atraves di un komunikado di prensa indiká ku nan a hasi tur loke ta posibel pa kumpli ku pueblo i nan ta hasi un yamada riba dunadónan di trabou pa ta indulgente na interes di nos kultura i nos isla.

Sinembargo den e kaso aki nan ta duna pueblo informashon robes i ta trata netamente di un aktitut indesisivo di e diputado aki ku no tin kurashi pa tuma un desishon formal, asta sabiendo ku e tin sosten di tantu organisashonnan di trahadó komo di dunadónan di trabou, manera indiká den karta di USIBO di yüni 2017. Asina un konsulta di hopi aña tokante statùs di Dia di Rincon a tèrminá kaminda el a kuminsá: papia hopi i hasi palabrashon huntu, pero finalmente gobièrnu ta sigui tòg su mes kaminda (polítiko).