E di tres ‘KvK Art Exhibition’ a atraé mas ku 200 bishitante

Riba djadumingu 21 di desèmber e di tres edishon di KvK Art Exhibition (Ekshibishon di Arte di Kámara di Komèrsio) a tuma lugá, e biaha akí den un ambiente festivo di Pasku. Mas ku 200 bishitante a bishitá e eksposishon, kaminda 25 artista a presentá nan obra na públiko.

E eksposishon a mustra un variedat amplio di forma di arte, entre otro pintura, arte di glas, obra di arte trahá for di material balioso, prenda, i fragansia i krema trahá na kas. Hopi bishitante a hasi uso di e oportunidat pa kumpra arte komo regalo di Pasku, loke a resultá den un benta eksitoso pa e artistanan ku a partisipá.

Tambe bou di e artistanan tabata tin un partisipante di e Sentro pa Empresariado  “The Next Step”: Dalitza Rijna di Pure Desires, ku a hala hopi interes ku su produktonan i empredementu kreativo.

Ku su ‘Art Exhibition’ Kámara di Komèrsio ta ofresé artistanan un plataforma pa laga habitantenan di nos isla sera konosí ku nan obra. E reakshonnan positivo di e bishitantenan i e partisipantenan ta aksentuá importansia di e inisiativa akí i ta motivá Kámara di Komèrsio pa konsiderá un di kuater edishon.

Banda di esaki durante e edishon akí Boneiru a konosé un primisia. Pa promé biaha nan a selektá un obra di arte ku lo keda eksponé den ‘lobby’ di Corallium Hotel & Villas, i di e manera akí arte lokal ta haña un lugá prominente den sektor turístiko.

Kámara di Komèrsio ta hasi uso di e oportunidat akí pa deseá tur empresario, fundashon i asosiashon un Bon Pasku i un Felis Aña Nobo.