Eksitoso Kick-Off pa Sentro pa Empresariado ‘The Next Step’

Ayera nochi Kámara di Komèrsio Boneiru ku hopi entusiasmo a lansa e programa nobo di Sentro pa Empresariado: ‘The Next Step – E Siguiente Paso’. E evento di kick-off ku a tuma lugá na Hotel Plaza Bonaire, a hala un sala yen di empresario ambisioso i (semi) avansá di nos isla. E anochi tabata kompletamente den signo di kresementu, kompartimentu di konosementu i inspirashon.

Kolaborashon i vishon

E presidente di Kámara di Komèrsio, Jeaniro Balentien, i e direktor Phar Martha, a habri e anochi, kendenan a aksentuá importansia di e programa di Sentro pa Empresariado pa Boneiru su desaroyo ekonómiko mas aleu. Despues a mustra un mensahe di video di Hamza Kacha, Mènedjer di Programa i Liaison pa e parti karibense di Reino na Ministerio di Asuntunan Ekonómiko, ku Kámara di Komèrsio Boneiru ta traha estrechamente huntu kuné pa e programa di Sentro pa Empresariado. El a ekspresá su apresio pa dedikashon di e empresarionan i a pone énfasis riba importansia di kolaborashon pa realisá kresementu ekonómiko duradero na nos isla.

Di empresarionan ku ta kuminsando pa empresarionan ku ta kresiendo

Seguidamente e konsehero empresarial di Kámara di Komèrsio Pierre Perigault Monte a presentá bèkgrount i meta di e programa. El a para ketu na e desafionan ku empresarionan ku ta kuminsando ta konfrontá na Boneiru i e éksitonan ku ya kaba e programa di Sentro pa Empresariado a logra.

Despues e konsehero empresarial di Kámara di Komèrsio Jian Magdalena a introdusí e trayekto nobo ‘The Next Step – E Siguiente Paso’, kaminda e enfoke ta move for di riba únikamente empresarionan ku ta kuminsando, pa empresarionan (semi) avansá ku ya kaba ta aktivo i ku ke sigui krese riba tereno di entre otro entrada, personal i database ku informashon di kliente. E programa ta ofresé sosten práktiko via kapasitashon, e sistema di mèntòr i coaching. Pa medio di kòmbersashon di ‘intake’ i guia individual ta formulá un análisis empresarial, ku ayudo di hèrmèntnan di análisis ku ta sinkronisá ku merkado boneriano. Di e manera akí ta stipulá ophetivonan di kresementu personalisá pa e empresa, ku seguidamente ta keda elaborá konforme e método ‘SMART’.

Informá, inspirá i motivá

E di dos parti di e anochi tabata den signo di konosementu i inspirashon. E promé orador tabata Eric Blijenberg ku su presentashon ‘The Impact of AI & Robotics on the Essentials of Product-Market Development’. E presentenan a haña informashon tokante e influensia di teknologia aktual i esun di futuro riba empresariado. Tambe el a duna konseho di kresementu a base di vários modelo di merkadeo den kombinashon ku Inteligensia Artifisial (AI).

Despues di un pousa kòrtiku Miles Mercera a inspirá e sala ku su presentashon ‘Next-Level Growth: From Passion to Purpose to Profit’. El a aksentuá importansia di deskubrimentu di e balor úniko di un produkto òf servisio i kon e kurashi pa apliká modelonan di merkadeo den kombinashon ku Inteligensia Artifisial (AI) por kondusí na kresementu duradero riba merkado boneriano.

Trabou di ret i mira padilanti

E anochi a finalisá ku un bríndis di ret, kaminda e empresarionan den un ambiente informal por a interkambiá di idea i eksplorá kolaborashonnan nobo. Kámara di Komèrsio Boneiru ta gradisí e oradornan Eric Blijenberg i Miles Mercera pa nan kontribushonnan balioso i ta hasi un yamada riba tur empresario (semi) avansá ku tin plan di kresementu pa registrá pa e programa di Sentro pa Empresariado ‘The Next Step – E Siguiente Paso. Nos ta kla pa duna bo asistensia!

Mas informashon i registrashon

Bo ta un empresario (semi) avansá ku ambishon pa laga bo empresa sigui krese? E ora ei registrá pa e programa ‘The Next Step – E Siguiente Paso’ via Kámara di Komèrsio Boneiru, pa medio di manda un email na bis@kvkbonaire.com òf pa medio di pasa un ratu na nos ofisina na Kaya Amsterdam 23.