Eksitoso tayer tokante aksesibilidat digital, e futuro di empresariado karibense

Riba djaweps 6 di novèmber SIM Caribbean a duna un eksitoso tayer interaktivo den kolaborashon ku Kámara di Komèrsio i Industria Boneiru (KdK Boneiru). E tema di e tayer interaktivo tabata ‘aksesibilidat digital, e futuro di empresariado karibense’. E partisipantenan tabata sumamente entusiasmá tokante e konosementu balioso i e tepnan práktiko ku nan a optené.

Durante e tayer e partisipantenan a siña tokante importansia di aksesibilidat digital i kon pa implementá i apliká esaki den nan organisashon, di manera ku nan por alkansá nan klientenan mas mihó i duna nan mihó servisio:

• Kon bo mes komo empresario por kontribuí na un komunidat digital i aksesibel;
• Kon bo por amplia bo grupo di enfoke i oumentá e posibilidatnan pa nan haña bo, pa medio di adaptashonnan chikitu pero hopi importante;
• Ehèmpelnan for di práktika i aplikashonnan ku ta presente den region òf ku nan ta bai introdusí dentro di poko;
• Konosementu di loke ya kaba nan ta aplikando i kon komo empresario bo por kana dilanti den área karibense;
• Ehèmpel di tendensianan, tepnan i hèrmèntnan pa kada tipo di empresario.

Ku satisfakshon Kámara di Komèrsio ta wak bèk riba e tayer akí i lo sigui komprometé su mes pa organisá seshonnan ku ta di balor agregá pa tur tipo di empresa i organisashon ku ta inskribí den Registro Komersial. Kámara di Komèrsio ta ekspresá su gratitut na e orador di SIM Caribbean, Wesley Eleonora, pa su entusiasmo i ekselente profeshonalidat.

Bo ke keda na altura di e tayernan, kursonan òf proyektonan ku Kámara di Komèrsio i Industria ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio na 717 – 5595 òf manda un email na bis@kvkbonaire.com