Eksitoso último seshon di Luna di Rekurso Humano di Kámara di Komèrsio Boneiru

Riba djabièrnè 30 di mei 2025 e último seshon di informashon di e Luna di Rekurso Humano (HR) di Kámara di Komèrsio Boneiru a tuma lugá, titulá ‘Kòmbersashon di Mal Notisia’. E seshon final akí tabata na enkargo di Judith Brekelmans di Teams i mas òf ménos 20 partisipante a tuma parti na esaki. E meta tabata pa ofresé sierto hèrmèntnan pa den un forma efektivo tene kòmbersashon di mal notisia den un organisashon.

Judith Brekelmans a papia tokante preparashon, ehekushon i kontinuashon di un kòmbersashon di mal notisia. Puntonan importante tabata entre otro intonashon i eskoho korekto di palabra, i importansia di empatia i trankilidat durante e kòmbersashon. Tambe el a pone énfasis riba importansia di un bon ‘follow-up’, di manera ku empleadonan por haña e sosten nesesario despues di e kòmbersashon.

E seshon tabata sumamente interaktivo, kaminda hopi partisipante a kompartí nan propio eksperensianan i a hasi pregunta. Esaki a sòru pa vários diskushon balioso i konosementu práktiko.

Kámara di Komèrsio Boneiru ta yama danki na Judith Brekelmans pa su aporte, i tambe na Lucas Drissen di HBN Law & Tax i na tur e partisipantenan pa nan partisipashon aktivo durante e Luna di Rekurso Humano. Tur hende a eksperensiá e seshonnan komo sumamente balioso, ku hopi tep práktiko ku e partisipantenan por apliká den nan propio trabou.