Elekshon pa miembro di direktiva di Kámara di Komèrsio i Industria
Dia 1 di yanüari 2022 a renobá e Dekreto Elektoral pa Kámaranan di Komèrsio i Industria BES. Modernisashon di e legislashon i regulashon akí ta hasi posibel pa Kámara di Komèrsio Boneiru hasi su tareanan den un forma mas efisiente i mas efektivo, na un manera ku ta kuadra ku espíritu di e époka aktual. E legislashon renobá tin entre otro konsekuensia pa e forma den kua di awor en adelante ta tene elekshon pa miembro di direktiva di Kámara di Komèrsio. Gustosamente nos ke yama bo atenshon riba e kambionan mas importante ku a tuma lugá.
No ta hasi distinshon mas entre representantenan di empresa grandi i empresa chikí. Di awor en adelante elekshon ta tuma lugá kada tres aña i no mas anualmente. Durante e elekshonnan akí kada biaha ta skohe henter e direktiva (konsistiendo di 5 miembro) na lugá di kada bes un parti di e direktiva. Entre 1 i 14 di novèmber kandidatonan por pone nan mes elegibel. Lo tene elekshon dentro di 30 dia despues di e periodo akí. Si durante e periodo entre dos elekshon tin miembro di direktiva ta renunsiá òf mester renunsiá, lo no tene elekshon, tanten ku sobra minimalmente 3 miembro di direktiva. Si sobra ménos ku 3 miembro di direktiva, Kolegio Ehekutivo di Entidat Públiko Boneiru lo designá un miembro di direktiva pa restu di e periodo te na e siguiente elekshon. Ta tene elekshon solamente ora ku tin mas ku 5 kandidato.
Konforme e legislashon nobo akí na fin di aña 2022 tur e aktual miembronan di direktiva di Kámara di Komèrsio lo renunsiá i elekshon pa henter e direktiva lo tuma lugá. E miembronan aktual di direktiva por pone nan mes reeligibel, a ménos ku hasiendo asina nan lo surpasá e término maksimal ku nan por tuma asiento den direktiva. Representantenan di empresanan i personanan hurídiko ku riba e dia di elekshon ta inskribí den Registro Komersial ta elegí e miembronan di direktiva, ku eksepshon di representantenan di asosiashonnan i fundashonnan. Den kaso ku no tin mas ku 5 kandidato, lo no tin mester di laga elekshon tuma lugá pa e direktiva nobo entrante di yanüari 2023.
Pa un persona pone su mes elegibel ta konta ku 15 representante inskribí di empresanan i personanan hurídiko (ku no ta asosiashon ni fundashon) mester sostene e postulashon komo kandidato. E kandidato ku ta pone su mes elegibel tambe mester ta inskribí den Registro Komersial komo dirigente di un empresa, e mester ta minimalmente 18 aña bieu riba e dia di elekshon i durante e último dos añanan e mester ta inskribí komo habitante di Boneiru.
Aparte di e kambionan akí nan a stipulá un prosedura nobo tambe pa elekshon. Esaki ta nifiká ku Kámara di Komèrsio lo no publiká lista elektoral mas i ku lo no manda karchi di vota pa e elekshon. Den medionan di komunikashon i pa medio di un informe general via e emailadrès di e inskripshon ku ta konosí serka Kámara di Komèrsio, ta anunsiá e orario i lugá di e elekshon. Kandidatonan ku ke pone nan mes elegibel tin ku duna esaki di konosé na Kámara di Komèrsio entre 1 i 14 di novèmber konforme e prosedura preskribí. Na fin di luna di novèmber 2022 ta anunsiá e lista definitivo di kandidato via medionan di komunikashon. Nos ta supliká empresarionan pa tene medionan di komunikashon i nan email bon na bista pa keda na altura tokante e próksimo elekshon pa direktiva di Kámara di Komèrsio.
Por pidi mas informashon via email: handelsregister@kvkbonaire.com