Empresarionan di sektor di Heavy Equipment ta uni forsa

Dia 17 di sèptèmber 2025 empresarionan for di e sektor di Heavy Equipment ku ta aktivo den sakamentu di greis a bini huntu na Kámara di Komèrsio pa formulá un punto di bista konhunto tokante futuro i tokante e desafionan den nan sektor.

E empresarionan ke forma un union pa para mas fuerte komo grupo. Pa medio di traha huntu den un asosiashon ofisial nan por hasi palabrashonnan klarito, ta surgi mas sosten mutuo i tin un partner di kòmbersashon konfiabel pa gobièrnu i pa nan klientenan. E intenshon ta ku 2 pa 3 representante fiho ta forma e punto di kontakto pa gobièrnu. Esaki ta evitá fragmentashon i ta sòru pa un komunikashon klarito na nòmber di henter e sektor. E empresarionan ke stipulá konhuntamente kua ta e mihó manera pa saka greis. Den esaki nan ta wak padilanti tambe: kon un buraku di greis ku bira bashí por haña un destinashon nobo na un manera responsabel, por ehèmpel komo dam pa warda awa.

E merkado aktual ta karakterisá pa preisnan muchu abou, di manera ku mantenshon i bon operashon empresarial ta bou di preshon. Pa e motibu akí e empresarionan ta aspirá pa yega na:

· Preis hustu i stabil pa ekipo i servisio pisá.

· Mas rèspèt i apresio di parti di klientenan pa e trabou ku keda entregá.

Den e asosiashon reglanan klarito mester bini na vigor pa tur miembro:

· Kore na un manera seif i responsabel.

· Tur papel i pèrmit mester ta aktualisá.

· Bon mantenshon di e trùknan i otro ekiponan.

· No tin kompetensia bou di preis.

· Tarifa stabil pa tur hende.

· Hasi negoshi na un manera sosialmente responsabel komo punto di salida.

Miembronan ku no ta tene nan mes na e reglanan akí, ta riska konsekuensia. Kolaborashon ta bira un punto di lansa pa e asosiashon.

Finalmente e empresarionan ta boga pa un sitio konhunto kaminda nan por kontinuá na un manera organisá i responsabel ku nan aktividatnan.

E enkuentro a tuma lugá na Kámara di Komèrsio, ku a pone su fasilidatnan disponibel. Kámara di Komèrsio a aksentuá e importansia di kolaborashon i a indiká ku empresarionan den e sektor akí tin benefisio di un aserkamentu konhunto.

“Al fin i al kabo, huntu nos ta fuerte,” segun Kámara di Komèrsio.