Empresarionan ta risibí sosten for di EZK atrobe

Empresarionan ku tin di aber ku pèrdida di volúmen di benta dor di e krísis di corona i ku pa e motibu ei tin difikultat di paga nan gastunan fiho, por entregá un aplikashon di nobo pa un kompensashon for di Ministerio di Asuntunan Ekonómiko i Klima (Economische Zaken en Klimaat, EZK). Ta trata di un areglo nobo kaminda e sosten por varia entre $500 i $55.000. E pago di un solo biaha aki ta bini riba e sosten den gastunan di salario pa kompanianan (Areglo di Emergensia di SZW) i e areglo ta sigui e kompensashon anterior di EZK di $2.200 i $4.400.

Den e areglo nobo aki, ta kalkulá e haltura di e sosten basá riba sifranan di volúmen di benta di e empresa. Ta kompará e sifranan di e lunanan mart te ku yüni 2019 ku e mesun periodo na 2020. Pa por bini na remarke, e volúmen di benta mester a baha por lo ménos ku 30% dor di e krísis di corona. Riba e wèpsait di RCN tin un módulo di kálkulo ku empresarionan por usa pa fásilmente kalkulá e montante ku nan lo por bini na remarke p’e. Den kaso ku e montante aki ta mas di $6.000, mester añadí un deklarashon di nan tenedó di buki òf akountent, den kua ta konfirmá e sifranan kompletá.

E kompensashon ta un sosten den gastunan fiho pa e periodo di 13 di yüni te ku 12 di òktober 2020. Empresanan ku ke bini na remarke pa e areglo, mester ta konosí na Belastingdienst Caribisch Nederland riba 13 di mart 2020 i mester ta ubiká na Boneiru, Saba òf Sint Eustatius. Riba https://papiamentu.rijksdienstcn.com/covid-19/pakete-di-emergensia/kompensashon-ezk por mira tur kondishon i informashon adishonal.

Komo ku e ministerio di EZK no tin instansia ehekutivo na Hulanda Karibense, unidat SZW di RCN ta bai ehekutá e areglo aki. Por entregá formularionan kompletamente yená i firmá, huntu ku e aneksonan nesesario, for di djamars 11 di ougùstùs te ku mas tardá djaweps 12 di novèmber 2020 via di e e-mail tegemoetkomingEZK@rijksdienstcn.com.

Pa ayudo ku aplikashon por tuma kontakto ku Kámara di Komèrsio na Boneiru via di steunloket@kvkbonaire.com. Pa preguntanan urgente, por tuma kontakto via di telefòn ku unidat SZW di RCN via 781-5554 / 781-5558 (Boneiru), 790-0052 (Sint Eustatius) i 416-3804 (Saba).