Evento di ‘follow-up’: Konektá islanan BES ku Colombia, Panamá i República Dominicana

Djabièrnè, 19 di sèptèmber 2025 – Kámara di Komèrsio i Industria Boneiru, (KdK Boneiru) huntu ku Gabinete di Enviado Spesial, Holland House Colombia, Holland House Panama, Entidat Públiko Boneiru i e partisipantenan di islanan BES a organisá un ‘follow-up’ di e mishonnan komersial pa Colombia, Panamá i República Dominicana.

Holland House Colombia, Holland House Panamá i Entidat Públiko Boneiru a tene un presentashon di kontinuashon pa e grupo, ku hopi ‘tips & tricks’ balioso.

Nos por informá bo ku dentro di e grupo grandi di partisipante, un kantidat konsiderabel ya kaba a pone vários paso pa hasi negoshi ku empresarionan na e diferente paisnan. Komo konsekuensia di e mishonnan komersial ya kaba nan ta importá produkto i kompartí konosementu ku empresanan na e paisnan en kestion, relashoná ku sektor di agrikultura i konstrukshon. Tin asta sierto empresanan ku a habri un establesimentu den e paisnan en kestion.

Durante e seshon nan a papia tokante e estudio logístiko di Colombia pa e islanan BES i kua ta e pasonan di kontinuashon ku mester tuma pa atendé ku e desafionan logístiko akí komo un paisahe uní di empresario pa islanan BES.

Nan a papia tambe tokante algun konklushon for di e estudio “Navigating the logistics chain between Colombia and the islands of Bonaire, St. Eustatius and Saba” (Grant Thornton). For di e puntonan akí nan a skohe e siguiente “low-hanging fruits” pa atendé komo promé kuné:

• Na kuminsamentu di aña 2026 lo hinka un grupo di trabou den otro pa traha riba e rekomendashonnan for di e estudio “Navigating the logistics chain between Colombia and the islands of Bonaire, St. Eustatius and Saba”
• Empresanan for di den region ku ta presentá nan produktonan na islanan CAS, ta haña invitashon pa den e mesun periodo bishitá Boneiru tambe.

Mas aleu nan a anunsiá ku pa aña 2026 ta bai organisá un evento di “Business Close to Home” ku Aruba i Kòrsou, pa di e manera ei promové e komèrsio mutuo entre e islanan. Den esaki empresanan lokal lo por mustra e otro dos islanan nan produktonan i vise vèrsa.

A klousurá e seshon ku un momentu di ret, kaminda e partisipantenan i organisadónan por a bebe algu i konsultá ku otro, kompartí konosementu i motivá otro.

Bo ke keda na altura di e tayernan, kursonan òf proyektonan di Kámara di Komèrsio i Industria Boneiru? E ora ei tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio via 717 – 5595 òf pa medio di manda un email na bis@kvkbonaire.com.