Kámara di Komèrsio Boneiru ta fortifiká empresarionan ku tayer tokante maneho finansiero i AI

Den lus di e desaroyonan mundial aktual, kaminda empresarionan direktamente i indirektamente ta keda konfrontá ku oumentu di preis komo konsekuensia di entre otro tarifa di importashon, preis di petroli ku ta oumentando i gastunan di transporte mas haltu, Kámara di Komèrsio di Industria Boneiru (KdK) den kolaborashon ku Executive Strategy Consultancy (Evert Bleijenberg) a organisá un seshon di informashon i tayer práktiko.

E tayer, ku komo tema “Create Value Through Financial Management”, a reakshoná aktivamente riba un nesesidat evidente serka empresarionan. Kámara di Komèrsio ta konstatá ku hopi empresa no tin sufisiente konosementu di nan struktura total di gastu, nan punto di ‘break even’ i di elastisidat di preis. E falta di konosementu akí den tempu di preshon ekonómiko por kondusí na desishonnan den purá i no-optimal.

Durante e seshon a ofresé e partisipantenan hèrmèntnan konkreto pa por reakshoná mihó riba oumentu di preis i pa limitá impakto di esaki riba nan operashon empresarial. E enfoke tabata riba desaroyo di balor agregá, maneho finansiero proaktivo i uso di inteligensia artifisial (AI) komo rekursonan stratégiko.

Maneho finansiero, kombiná ku uso di inteligensia artifisial (AI) a keda posishoná komo un yabi esensial pa yega na kresementu duradero. A enkurashá empresarionan pa no sigui manehá solamente riba volúmen, pero netamente riba márgen, strategia i eskohonan bon pensá.

Durante e tayer a laga e partisipantenan sera konosí ku entre otro:       

• Kalkulashon i aplikashon di márgen di kontribushon i ‘break even’ komo instrumentu di maneho pa rentabilidat;
• Importansia di desaroyo di balor komo impulsor mas importante pa éksito finansiero;
• Konosementu di e instrumentunan di maneho finansiero mas importante: preis, gastu i volúmen;
• Konsientisashon tokante e impakto i e oportunidatnan di inteligensia artifisial (AI) riba strategia, organisashon i modelonan di negoshi;
• Hèrmèntnan práktiko, manera determinashon di elastisidat di preis pa mihó posishonamentu riba merkado i strategia di preis.

Ku satisfakshon Kámara di Komèrsio ta wak bèk riba e seshon akí i lo sigui komprometé su mes pa organisamentu di aktividatnan ku ta kontribuí na fortifikashon di nos mundu empresarial lokal.

Kámara di Komèrsio ta ekspresá su gratitut na e orador di Executive Strategy Consultancy, señor Evert Bleijenberg, pa su ekspertisio, su entusiasmo i su kapasidat pa transmití problemátikanan kompleho na un manera aksesibel.

Bo ke keda na altura di e tayernan, kursonan òf proyektonan ku Kámara di Komersio i Industria ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio na 717 – 5595 òf manda un email na bis@kvkbonaire.com