Kámara di Komèrsio Boneiru ta lansá di dos edishon di Innovation Academy ku tema ‘Edukashon’
Di un idea inovativo pa realidat: un oportunidat pa tur hende ku ke kontribuí na futuro di edukashon na Boneiru.
Kralendijk, Boneiru – novèmber 2026 – Kámara di Komèrsio i Industria Boneiru (KvK) ta anunsiá ku orguyo e di dos edishon di Innovation Academy. Despues di e promé edishon, ku a wordu organisá den kolaborashon ku Tourism Corporation Bonaire (TCB) i ku tabata enfoká riba inovashon den sektor di turismo, e aña akí nos a skohe pa pone e tema ‘Edukashon’ sentral.
Ku e edishon akí, Kámara di Komèrsio ke stimulá pensadónan inovativo, empresarionan i personanan kreativo pa desaroyá solushonnan nobo ku por kontribuí na futuro di edukashon na Boneiru.
Bo tin un idea ku por kambia nos manera di siña, kria òf desaroyá? E ora ei t’abo Innovation Academy ta buskando!
Di idea pa realidat
For di tur e ideanan ku wordu mandá aden, lo selektá e 10 plannan di mas inovativo. Riba 17 di novèmber 2026 lo anunsiá e 10 partisipantenan selektá, kende lo haña e oportunidat pa partisipá na tayernan intensivo di Design Thinking riba 24 i 25 di novèmber 2026.
Durante e tayernan akí, e partisipantenan lo siña kon pa elaborá nan idea paso pa paso te bira un konsepto konkreto i ku por wordu realisá. Bou di guia, nan lo traha riba identifikashon di problema, desaroyo di solushonnan kreativo i elaborashon di nan idea.
Riba 11 di desèmber 2026, e partisipantenan lo haña e oportunidat pa presentá nan konsepto dilanti di un hurado durante e Shark Tank Event (Evento di Tanki di Tribon). Durante e evento akí nan lo tin chèns pa gana un kapital di inisio pa duna bida na nan idea inovativo.
Innovation Academy lo sera di manera festivo riba 12 di desèmber 2026, ku un seremonia di entrega di sertifikado.
Kon bo por partisipá?
Tur hende ku tin un idea inovativo riba tereno di edukashon ta invitá pa registrá. No ta nesesario pa bo tin un plan di negoshi kompletamente elaborá. Loke ta konta prinsipalmente ta un idea inovativo, e impakto ku e por tin i bo motivashon pa desaroya esaki mas aleu.
Partisipá ta simpel:
Paso 1 – Registrá bo mes
Yena e formulario ofisial di inskripshon di Kámara di Komèrsio Boneiru: https://forms.cloud.microsoft/e/b7JFi3MTJk
Paso 2 – Kompartí bo idea inovativo
Manda un deskripshon kòrtiku di bo idea via e-mail, òf graba un video di maksimal 2 minüt i manda esaki via Facebook Messenger di Kámara di Komèrsio Boneiru.
Kontestá e siguiente preguntanan:
- Kiko ta bo idea? (máksimo 150 palabra)
- Kua problema den edukashon bo ke solushoná? (máksimo 100 palabra)
- Pa ken bo solushon ta destiná? (máksimo 50 palabra)
- Kon bo solushon lo funshoná mas o ménos? (máksimo 150 palabra)
- Kiko ta hasi bo idea diferente òf inovativo? (máksimo 50 palabra)
- Kon leu bo a yega ku bo idea te awor? (máksimo 50 palabra)
- Dikon bo ke partisipá na Innovation Academy? (máksimo 100 palabra)
Bo ta preferá konta nos bo idea na lugá di skirbi? Ningun problema! Graba un video di maksimal 2 minüt den kua bo ta kontestá e preguntanan akí i manda esaki via Facebook Messenger di Kámara di Komèrsio Boneiru. No ta nesesario pa bo tin un empresa, prototipo òf un plan kompletamente elaborá. Ideanan ku ainda ta den nan fase inisial ta bonbiní tambe.
E último dia pa registrá i manda bo idea aden ta 14 di novèmber 2026.
Nos ta invitá tur persona interesá pa registrá na tempu i manda nan idea aden.
Mas informashon i registrashon:
Formulario di inskripshon: https://forms.cloud.microsoft/e/b7JFi3MTJk
E-mail pa manda idea: bis@kvkbonaire.com
Facebook Messenger: Kámara di Komèrsio Boneiru
Pa mas informashon òf pregunta di prensa:
Kámara di Komèrsio i Industria Boneiru
+599 717 5595 | Kaya Amsterdam 23 | bis@kvkbonaire.com