Kámara di Komèrsio Boneiru ta partisipá na ‘Feria di Trabou’ i ta promové empresariado

Kralendijk, 6 di òktober 2025 – Kámara di Komèrsio Boneiru (KdK) riba djabièrnè 3 di òktober 2025, ku hopi entusiasmo a partisipá na e ‘Feria di Trabou’, un marshe di trabou ku Plenchi di Trabou a organisá. Kámara di Komèrsio ta haña ku ta importante pa ta presente na e tipo di eventonan akí pa fiha atenshon riba empresariado komo un opshon balioso pa outosufisiensia.

Kámara di Komèrsio a laga e bishitantenan mira ku empresariado por ta un alternativa ekselente pa hende ku ta buskando trabou i ku pa basta tempu kaba ta kanando rònt ku e idea pa nan mes kuminsá ku un negoshi. Empresarionan por determiná nan propio rumbo i kontribuí na ekonomia di nos isla.

Banda di duna informashon na e marshe di trabou, Kámara di Komèrsio a organisá tambe un tayer interaktivo tokante kon pa kuminsá un propio empresa. Durante e seshon akí nos a kompartí vários tep práktiko tokante e pasonan básiko di empresariado, manera eskoho di un forma hurídiko, registrashon den registro komersial i otro aspektonan importante. Tabatin hopi interes pa e tayer ku a brinda e partisipantenan konosementu tokante e posibilidatnan pa kuminsá ku un propio negoshi.

Kámara di Komèrsio a ripará ku tin hopi hende ku tabata kana rònt na e marshe di trabou ku ideanan tokante un empresa, pero ku hopi biaha tin un tiki miedu pa pone pasonan konkreto. Duda tokante kua ta e pasonan ku nan mester tuma, òf e impreshon ku e proseso lo ta muchu kompliká, te ku awor a stroba nan pa konkretamente realisá nan ideanan. Kámara di Komèrsio a hasi palabrashon ku diferente bishitante pa duna nan guia mas aleu ku elaborashon di nan ideanan pa bira empresario.

Kámara di Komèrsio Boneiru ta gradisí Plenchi di Trabou pa e oportunidat pa kontribuí aktivamente na e dia informativo akí i ta spera di por sigui sostené e partisipantenan ku a haña inspirashon i e potensial empresarionan mas aleu.