Kámara di Komersio ta organisá reunion di siguimentu pa sektor di konstrukshon

Resientemente un reunion di kontinuashon a tuma lugá na Kámara di Komèrsio entre representantenan di e sektor di konstrukshon, diputado Cicilia i empleadonan di entidat públiko Boneiru.

E reunion akí tabata kontinuashon di un reunion anterior, kaminda un grupo di representante di e sektor di konstrukshon a ekspresá nan preokupashon tokante e retraso ku nan ta eksperensiá den e proseso di dunamentu di pèrmit i e konsekuensianan di esaki. Relashoná ku esaki Kámara di Komèrsio a manda un karta pa entidat públiko Boneiru i a sinta na mesa ku diputado Anjelica Cicilia.

Komo fasilitadó Kámara di Komèrsio a organisá e reunion di kontinuashon, kaminda tantu entidat públiko Boneiru komo e grupo di representante di e sektor di konstrukshon tabata presente, i ámbos a duna splikashon tokante nan preokupashon i nan vishon. Banda di e puntonan menshoná akí riba, nan a papia tambe tokante e siguiente tópikonan:

Sektor di konstrukshon:

• Ordenansa di bibienda
• Falta di un dokumentu di maneho stratégiko, un asina yamá ‘Structuurvisie’
• No ta otorgá tereno di èrfpagt
• Eksigensianan ku no ta klarito tokante konstrukshon nobo i rebendementu di tereno di èrfpagt
• Palabrashonnan relashoná ku konstrukshon nobo, konosí komo ‘Woondeal’, i otorgamentu di pèrmit di konstrukshon
• Dentro di e sektor di konstrukshon na e momentu akí apénas tin proyekto grandi, loke a kondusí na hopi retiru
• Gastunan di transporte ku ta oumentando, loke ta hasi invershon ménos atraktivo
• E sektor di konstrukshon ta supliká entidat públiko Boneiru pa bai komuniká mas mihó ku pueblo tokante kiko su intenshonnan ta

E sektor di konstrukshon a uni i awor nan ta lantando un ‘Asosiashon pa Boneiru ku ta Konstruyendo’. Inisialmente esaki lo konsistí di e siguiente miembronan: B4U Development (miembro di direktiva), Blokkenfabriek, BONNED Contractors (miembro di direktiva), BWM, Deco, Haafkes, Kooyman, NijBo, Playa Trading, Roosdom Tijhuis Bonaire (miembro di direktiva), Steen Bouwadvies i StoneCrusher. Despues di e lantamentu otro organisashonnan tambe por djòin.

Entidat Públiko Boneiru:

• Por lo pronto e kondishonnan pa èrfpagt ta keda sin kambio pa evitá maluso.
• Entidat públiko Boneiru su aspirashon ta pa sòru pa tur hende tin akseso hustu na un espasio pa biba i pa e hendenan korekto ta bini na remarke pa un bibienda. Pa esaki a entregá un nota inisial pa un Ordenansa di Bibienda na Konseho Insular. Meta di e ordenansa akí ta pa regulá merkado, pero no pa daña esaki, sino netamente pa sòru pa tur hende tin akseso hustu na un espasio pa biba i pa e hendenan korekto ta bini na remarke pa un bibienda. Ta reservá bibienda te $ 533.000 USD pa sierto gruponan di enfoke. Diputado Anjelica Cicilia a indiká ku entidat públiko Boneiru ta habrí pa adaptashon di e suma akí.
• Entidat públiko Boneiru a trankilisá e sektor di konstrukshon, i a bisa ku ta sigui otorgá tereno di èrfpagt na desaroyadónan. Tambe diputado Anjelica Cicilia a indiká ku e ta bai hala atenshon di e aparato interno di empleado públiko, di manera ku nan ta sòru pa pueblo haña informashon korekto.
• Entidat públiko Boneiru ta rekonosé ku otorgamentu di pèrmit di konstrukshon ta un desafio grandi, pero e ta sigurá tambe ku nan ta hasi tur loke ta posibel pa mehorá e proseso akí den gobièrnu.
• No opstante e señalnan ku konstrukshon a para ketu, for di e sifranan ta resultá ku esaki no ta wantá, mirando e kantidat di pèrmit di trabou ku ta oumentando.
• Señalnan for di e sektor ta ku kompanianan no ta kumpli ku pago korekto di sueldo, konforme e sueldo mínimo legal stipulá.
• Un yamada ta bai na e sektor di konstrukshon pa kompartí mas dato ku entidat públiko Boneiru.

Kámara di Komèrsio ta wak bèk riba un diálogo konstruktivo entre e sektor di konstrukshon i entidat públiko Boneiru i tin tur konfiansa ku e partidonan enbolbí ta sigui buska kontakto ku otro i traha huntu pa atende ku e desafionan den e sektor i ‘Uni Forsa’.