Kámara di Komersio ta organisá reunion di siguimentu pa sektor di konstrukshon

Dia 24 di febrüari último, un reunion di kontinuashon a tuma lugá na Kámara di Komèrsio, entre representantenan di e sektor di konstrukshon i diputado Cicilia i empleadonan di entidat públiko Boneiru. 

E reunion akí tabata kontinuashon di un reunion anterior, kaminda un grupo di representante di e sektor di konstrukshon a ekspresá nan preokupashon serka Kámara di Komèrsio, tokante e retrasonan den e proseso di dunamentu di pèrmit i e konsekuensianan di esaki. 

Komo fasilitadó, Kámara di Komèrsio a organisá e reunion di kontinuashon, kaminda tantu entidat públiko Boneiru komo e grupo di representante di e sektor di konstrukshon tabata presente i ámbos a duna splikashon tokante nan preokupashonnan i nan vishon. Banda di e puntonan menshoná akí riba, nan a deliberá tambe ku otro tokante ponementu disponibel di terenonan di èrfpagt i e asina yamá ‘structuurvisie’, inkluyendo e ordenansa di bibienda. Entidat públiko Boneiru a indiká di ta habrí pa mas diálogo pa optimalisá ehekushon di e ordenansa.  

Kámara di Komèrsio ta wak bèk riba un diálogo konstruktivo entre e sektor di konstrukshon i entidat públiko Boneiru i tin tur konfiansa ku e partidonan enbolbí ta sigui buska kontakto ku otro i sigui traha huntu pa atendé ku e desafionan den e sektor den forma di uni forsa.