Kámara di Komèrsio ta selebrá empresariado durante “𝐆𝐥𝐨𝐛𝐚𝐥 𝐄𝐧𝐭𝐫𝐞𝐩𝐫𝐞𝐧𝐞𝐮𝐫𝐬𝐡𝐢𝐩 W𝐞𝐞𝐤” 𝟐𝟎𝟐𝟑

“Global Entrepreneurship week” ta un siman ku desenas di miles di evento rònt mundu ku ta stimulá i inspirá empresarionan dentro di nan propio ekosistema. Organisashonnan ta hasi uso di e siman akí pa organisá aktividat ku ta reflehá loke ta pasa durante e aña ei den henter e organisashon. E lema di Global Entrepreneurship Week pa e aña akí ta “Bonaire Island of Creativity & Possibility – Boneiru, Isla di Kreatividat i Posibilidat”.

Di e manera akí Kámara di Komèrsio ta dediká atenshon spesial na “Global Entrepreneurship Week” pa medio di ofresé empresarionan ku ta kuminsando e posibilidat pa partisipá na guia den un programa nobo. Kámara di Komèrsio a kuminsá ku “Sentro pa empresariado”. E sentro akí mester sòru pa stimulá empresariado mas tantu ainda bou di nos poblashon lokal, pa mehorá e klima empresarial na Boneiru, pa drecha e ret di organisashon i pa logra ku e organisashonnan ku ta duna guia na empresario ta bai traha huntu mas mihó. Ta trata akí di un kolaborashon entre, entre otro, Kámara di Komèrsio, Servisio di Reino pa Hulanda Empresarial (Rijksdienst voor Ondernemend Nederland – RVO), Entidat Públiko Boneiru, Qredits i otro partidonan. Pa esaki Kámara di Komèrsio a haña un tarea i finansiamentu di Ministerio di Asuntunan Ekonómiko i Klima. Ta duna guia personal na empresarionan ku ta kuminsando pa loke ta trata nan kreatividat i nan posibilidatnan.

Ku esaki Kámara di Komèrsio ta fiha atenshon riba ‘Global Entrepreneurship Week’, ku ta tuma lugá rònt mundu durante e siman di 13 te ku 19 di novèmber 2023. Banda di esaki Kámara di Komèrsio ta selebrá e echo ku empresariado ta hopi popular na Boneiru, mirando e interes ku a oumentá pa kuminsá ku un empresa na Boneiru. Pa mas informashon i/òf interes tokante lantamentu di un empresa bo por tuma kontakto ku Kámara di Komèrsio Boneiru, departamento di BIS na number di telefòn +599 717 – 5595 òf manda un email na bis@kvkbonaire.com òf ondernemerschap@kvkbonaire.com